महाराष्ट्र नवनिर्माण सेनेच्या सदस्य नोंदणी मोहिमेला वेग आला असून आता मराठी चित्रपटसृष्टीतील कलाकारांनीही या उपक्रमाला पाठिंबा दिला आहे. मनसेप्रमुख राज ठाकरे यांच्या उपस्थितीत अनेक मराठी कलाकारांनी पक्षाचे सभासदत्व स्वीकारले. दादरमधील ‘शिवतीर्थ’ या निवासस्थानी आयोजित कार्यक्रमात ही सदस्य नोंदणी पार पडली. मनसेच्या वर्धापन दिनानिमित्त सुरू करण्यात आलेल्या या अभियानाला कलाकारांचा प्रतिसाद मिळाल्याने पक्षाच्या कार्यकर्त्यांमध्ये उत्साहाचे वातावरण निर्माण झाले आहे. यंदा 9 मार्च रोजी किल्ले रायगडाच्या पायथ्याशी महाराष्ट्र नवनिर्माण सेनेचा 20 वा वर्धापन दिन मोठ्या उत्साहात साजरा करण्यात आला. या कार्यक्रमात राज ठाकरे यांनी पदाधिकारी आणि कार्यकर्त्यांना मार्गदर्शन करत राज्यभर मोठ्या प्रमाणावर सदस्य नोंदणी मोहीम राबवण्याचे आवाहन केले होते. त्याचबरोबर स्थानिक पातळीवर संघटन अधिक मजबूत करण्यासाठी आणि जनसंपर्क वाढवण्यासाठी पदाधिकाऱ्यांनी अधिक सक्रिय व्हावे, असेही त्यांनी सांगितले होते. या पार्श्वभूमीवर दादर येथील शिवतीर्थ निवासस्थानी सदस्य नोंदणीचा विशेष कार्यक्रम आयोजित करण्यात आला. या कार्यक्रमात अभिनेते पुष्कर श्रोत्री, भरत जाधव, दिग्दर्शक केदार शिंदे तसेच अॅडव्होकेट गुरु भरत दाभोलकर यांनी उपस्थित राहून मनसेच्या सदस्य नोंदणी प्रक्रियेत सहभाग घेतला. मराठी कलाक्षेत्रातील या मान्यवरांच्या उपस्थितीमुळे कार्यक्रमाला विशेष रंग चढला. कलाकारांनी राज ठाकरे यांच्या नेतृत्वावर विश्वास व्यक्त करत पक्षाच्या उपक्रमांना पाठिंबा देण्याची भूमिका घेतली. मोहिमेला आणखी गती मिळण्याची शक्यता या कार्यक्रमाला मनसेच्या चित्रपट सेनेचे अध्यक्ष अमेय खोपकर आणि पक्षाच्या नेत्या शालिनी ठाकरे देखील उपस्थित होत्या. मनसेच्या 20 व्या वर्धापन दिनानिमित्त राज्यभर सदस्य नोंदणी अभियान राबवले जात असून विविध क्षेत्रातील व्यक्तींना पक्षाशी जोडण्याचा प्रयत्न केला जात आहे. त्याचाच भाग म्हणून आता मराठी चित्रपटसृष्टीतील कलाकारांनीही राज ठाकरे यांच्या आवाहनाला प्रतिसाद देत पक्षाचे सभासदत्व स्वीकारले आहे. त्यामुळे आगामी काळात या मोहिमेला आणखी गती मिळण्याची शक्यता व्यक्त केली जात आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
