छत्रपती संभाजीनगर परिमंडलातील 5 लाखांहून अधिक ग्राहकांकडे थकीत 300 कोटी रुपयांच्या वीजबिल वसुलीसाठी महावितरणने धडक मोहीम सुरू केली आहे. नोव्हेंबर महिन्यात जवळपास 7 हजार थकबाकीदारांचा पुरवठा खंडित करण्यात आला आहे.
.
ग्राहकांनी चालू बिलासह थकबाकी भरून सहकार्य करावे आणि वीजपुरवठा खंडित होण्याची कारवाई टाळावी, असे आवाहन महावितरणने केले आहे.
संभाजीनगरही रडारवर
छत्रपती संभाजीनगर परिमंडलात घरगुती, व्यावसायिक, औद्योगिक व इतर वर्गवारीतील एकूण 5 लाख 9 हजार 732 ग्राहकांकडे 296 कोटी 88 लाख रुपयांची वीजबिल थकबाकी आहे. यात घरगुती वर्गवारीतील 4 लाख 59 हजार 444 ग्राहकांकडे 239 कोटी 11 लाख, व्यावसायिक वर्गवारीतील 37 हजार 290 ग्राहकांकडे 32 कोटी 80 लाख, औद्योगिक वर्गवारीतील 7 हजार 49 ग्राहकांकडे 13 कोटी 24 लाख व इतर वर्गवारीतील 5 हजार 649 ग्राहकांकडे 11 कोटी 73 लाख रुपयांची थकबाकी आहे.
जालन्यातही कारवाई
छत्रपती संभाजीनगर शहर मंडलातील 1 लाख 34 हजार 741 ग्राहकांकडे 69 कोटी 6 लाख, छत्रपती संभाजीनगर ग्रामीण मंडलातील 2 लाख 32 हजार 496 ग्राहकांकडे 84 कोटी 79 लाख व जालना मंडलातील 1 लाख 42 हजार 495 ग्राहकांकडे 143 कोटी 3 लाख रुपयांची थकबाकी आहे. वसुलीसाठी छत्रपती संभाजीनगर परिमंडलातील शहर, ग्रामीण व जालना मंडलात महावितरणतर्फे धडक वसुली मोहीम सुरू करण्यात आलेली आहे.
अभियंते सरसावले
मुख्य अभियंता पवनकुमार कछोट यांच्या मार्गदर्शनाखाली सर्व अधीक्षक अभियंते, कार्यकारी अभियंते, उपविभागीय अभियंते, शाखा अभियंते, तांत्रिक कर्मचारी या मोहिमेत प्रत्यक्ष ग्राहकांकडे भेट देऊन थकबाकी वसुलीसाठी सरसावले आहेत. अनेक ग्राहक तातडीने बिल भरून सहकार्य करत आहेत. तर जे ग्राहक बिल भरण्यास प्रतिसाद देत नाहीत, त्यांचा वीजपुरवठा नाईलाजास्तव खंडित करण्याची कारवाई या मोहिमेत करण्यात येत आहे.
सुट्टीच्या दिवशीही मोहीम
चालू नोव्हेंबर महिन्यात छत्रपती संभाजीनगर शहर मंडलातील 5 हजार 15, ग्रामीण मंडलातील 942 व जालना मंडलातील 893 ग्राहकांचा वीजपुरवठा थकबाकीपोटी खंडित करण्यात आला आहे. यानंतरही ग्राहक अनधिकृतरित्या वीज वापरत असेल तर त्याच्यावर कायदेशीर कारवाई करण्यात येत आहे. सुट्टीच्या दिवशीदेखील ही मोहीम सुरू आहे. तरी परिमंडलातील सर्व ग्राहकांनी थकबाकी व चालू वीजबिले भरून सहकार्य करावे व संभाव्य गैरसोय टाळावी, असे आवाहन महावितरणच्या छत्रपती संभाजीनगर परिमंडलाचे मुख्य अभियंता पवनकुमार कछोट यांनी केले आहे.
बिल भरण्यासाठी विविध पर्याय
वीजबिल भरण्यासाठी महावितरणने अधिकृत वीजबिल भरणा केंद्रांसह विविध ऑनलाईन पर्याय उपलब्ध करून दिले आहेत. वीजबिलावरील क्यूआर कोड स्कॅन करून वीजबिल भरता येते. महावितरण मोबाईल ॲप, www.mahadiscom.in हे संकेतस्थळ तसेच विविध यूपीआय ॲपद्वारे घरबसल्या ऑनलाईन वीजबिल भरता येते. वेळेत ऑनलाईन वीजबिल भरल्यास 0.25 टक्के सूटही मिळते.
मनस्ताप अन् भुर्दंड टाळा
महावितरणने आपले वीज कनेक्शन तोडण्याची वाट न पाहता ग्राहकांनी चालू महिन्याच्या वीजबिलासह थकबाकीची रक्कम विनाविलंब भरून सहकार्य करावे. थकबाकीसाठी कनेक्शन तोडल्यास बिलाच्या रकमेसह पुनर्जोडणी शुल्क भरावे लागते. सिंगल फेज जोडणीसाठी 310 रुपये तर थ्री फेजजोडणीसाठी 520 रुपये पुनर्जोडणी शुल्क आकारले जाते. हा भुर्दंड टाळण्यासाठी वेळेत वीजबिल भरणे आवश्यक असल्याचे महावितरणने म्हटले आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
