खासदार उदयनराजेंच्या वक्तव्यामुळे नवा वाद पेटण्याची शक्यता आहे. महात्मा फुले यांच्या जयंतीनिमित्त फुलेवाड्यात आलेल्या उदयनराजेंनी केलेलं वक्तव्य वादात अडकलं आहे. थोरले प्रतापसिंह महाराजांकडून महिलांची पहिली शाळा सुरु करण्यात आली असा दावा उदयनराजेंनी केला आहे. उदयनराजेंच्या या वक्तव्यावर ओबीसी नेते मंगेश ससाणेंनी टीका केली आहे.
उदयनराजे नेमकं काय म्हणाले?
“एका दृष्टीकोनातून आपण पाहिलं तर थोरले प्रतापसिंह महाराज जे होते, त्यांचं महात्मा फुलेंनी अनुकरण केलं. सर्वप्रथम स्त्री शिक्षणाची शाळा जर कुणी सुरु केलं असेल तर ती थोरले प्रतापसिंह महाराज यांनी सुरु केली. तीदेखील स्वत:च्या राजवाड्यात सुरु केली. त्या राजवाड्यात कालांतराने ज्यांनी देशाचं संविधान लिहिलं ते डॉक्टर बाबासाहेब आंबेडकर यांचं प्राथमिक शिक्षण त्याच राजवाड्यात झालं”, असं उदयनराजे भोसले म्हणाले आहेत.
उदयनराजे यांच्या यांच्या या वक्तव्याचा समाचार ओबीसी नेते मंगेश ससाने यांनी घेतला आहे. “जे सातारचे महाराज आहेत त्यांना महात्मा फुले यांनी 1 जानेवारी 1948 साली भिडेवाडा येथे मुलींची पहिली शाळा सुरु केली यावरही आक्षेप आहे. एक नवा शोध उदयनराजे यांच्या माध्यमातून लागत आहे. यासाठी सगळे इतिहासतज्ज्ञ, संशोधक त्यांच्यासमोर फेल ठरले आहेत. उदयनराजे यांनी जो गौप्यस्फोट केला आहे हा महाराष्ट्राचा सामाजिक, शैक्षणिक क्रांतीचा इतिहास आहे त्याला धक्का देणारा आहे,” असं ते उपहासात्मकपणे म्हणाले आहेत.
काँग्रेसचे प्रदेशाध्यक्ष हर्षवर्धन सपकाळ यांनीही यावर भाष्य केलं आहे. “महात्मा फुले वाड्यात येऊन उदयनराजे असं बोलत असतील तर ते चुकीचे आहे. खोटा इतिहास पसरवण्याचा प्रयत्न उदयनराजे यांच्याकडून होऊ नये. अन्यथा कोण होतास तू काय झालास तू असं म्हणावं लागेल,” असी प्रतिक्रिया त्यांनी दिली आहे.
प्रकाश आंबेडकरांचा फुले चित्रपटावरुन सेन्सॉर बोर्डाला इशारा
महात्मा फुले चित्रपटाच्या संदर्भातील सेन्सॉर बोर्डाच्या जातीवादी निर्णयाच्या विरोधात वंचित बहुजन आघाडीचे अध्यक्ष प्रकाश आंबेडकर यांनी आंदोलन केलं. पुण्यातील महात्मा फुले वाडाच्या समोरच आंदोलन करण्यात आलं. काही वर्ग असा आहे, काही समूह असे आहेत की त्यांना महात्मा ज्योतिबा फुले, सावित्रीबाई फुले यांनी सुरुवात केलेली क्रांती ही अजूनही त्यांच्यामध्ये जळजळतंय, त्यामुळे विरोध चाललेला आहे अशी टीका त्यांनी केली.
सेंन्सॉर बोर्डाला विरोध करण्याचा अधिकार नाही आणि सेंन्सॉर बोर्ड हे जर विरोध असाच ठेवणार असेल तर बोर्डाच्या सदस्यांच्या घरासमोर आम्ही निदर्शन केल्याशिवाय राहणार नाही असा इशारा त्यांनी दिला आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
