पुणे येथे एका निलंबित पोलिस हवालदाराने महिला पार्लर व्यावसायिकाची अडीच लाखांहून अधिक रक्कम आणि सहा तोळे सोन्याचे दागिने घेऊन फसवणूक केल्याचे समोर आले आहे. गणेश अशोक जगताप (वय ५२, रा. कावेरीनगर, वाकड, पुणे) असे आरोपीचे नाव असून, त्याच्याविरुद्ध भारती
.
सुखसागरनगर, कात्रज येथील ४३ वर्षीय महिलेने दिलेल्या फिर्यादीनुसार, जगताप यांचा त्यांच्याशी जुना कौटुंबिक परिचय होता. डिसेंबर २०१९ मध्ये जगताप यांनी पत्नीला कॅन्सर झाल्याचे आणि कुटुंबाला कोरोनाचा त्रास झाल्याचे कारण देत महिलेकडून एक लाख रुपये उधार घेतले. त्यानंतर डिसेंबर २०२० मध्ये आर्थिक अडचणीचे कारण देत त्यांनी महिलेच्या लग्नातील सुमारे सहा तोळे सोन्याचे दागिने गहाण ठेवण्यासाठी घेतले. पुढे मुलीच्या शिक्षणासाठी फोनपेद्वारे १.५७ लाख रुपये घेतल्याचेही तक्रारीत नमूद आहे. वारंवार मागणी करूनही पैसे किंवा दागिने परत न केल्याने महिलेने अखेर पोलिस आयुक्तालयाकडे आणि नंतर भारती विद्यापीठ पोलिस ठाण्यात तक्रार दाखल केली.
गणेश जगताप याच्यावर यापूर्वीही फसवणुकीचे अनेक गुन्हे दाखल आहेत. जुलै महिन्यात चतुःशृंगी पोलिस ठाण्यात एका महिलेचे ७३ तोळे सोने आणि १७ लाख रुपये रोख घेऊन फसवणूक केल्याचा गुन्हा त्याच्यावर नोंदवण्यात आला होता. २१ ऑगस्ट २०२४ रोजी त्याची पोलिस मुख्यालयातून विशेष शाखेत बदली झाली होती, परंतु तो हजर झाला नाही. या काळात त्याने औंध येथील एका सराफाला माजी वरिष्ठ पोलिस अधिकाऱ्याचे नाव वापरून ८ लाख २२ हजार रुपयांचे दागिने खरेदी करून गंडा घातला होता. या घटनेनंतर विशेष शाखेचे तत्कालीन पोलिस उपायुक्त मिलिंद मोहिते यांनी जगतापला निलंबित केले होते.
याशिवाय, २०२१ मध्ये राष्ट्रपती पदक मिळवण्यासाठी खोटे कागदपत्रे सादर करून सरकारने फसवणूक केल्याचा आरोपही जगतापवर आहे. या प्रकरणी पुणे पोलिस दलातील गणेश जगतापसह दोन लिपिकांवर वानवडी पोलिस ठाण्यात गुन्हा दाखल करण्यात आला होता.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
