Kunal Kamra: कॉमेडियन कुणाल कामराच्या मुंबईतील घरी आज मुंबई पोलीस गेले होते. कुणाल कामराचे आई वडील दादर माहिम येथे वास्तव्यास असल्याची माहिती पोलिसांना मिळाली होती. या पार्श्वभूमीवर खार पोलिसांनी याच ठिकाणी त्याच्या आई-वडिलांविषयी चौकशी केली. कुणालला 31 तारखेला हजर होण्याचे आवाहन करण्यात आले होते. आज कुणाल कामरा चौकशीसाठी हजर न झाल्याने त्याच्या घरी पोलिसांचं एक पथक येऊन गेलं. तसेच त्याठिकाणी पोलिसांचाही बंदोबस्त लावण्यात आलाय. दरम्यान कुणाल कामराने यासंदर्भात पोस्ट लिहून मुंबई पोलिसांना डिवचलंय.
नेमकं काय प्रकरण?
स्टँडअप कॉमेडियन कुणाल कामरने उपमुख्यमंत्री एकनाथ शिंदेंवर उपहासात्मकपणे टीका केली होती. महाराष्ट्रातील राजकीय घडामोडी, शिवसेना फुटीवर कुणाल कामराने गाण्याच्या माध्यमातून भाष्य केलं आहे. यानंतर शिवसैनिक संतापले आणि त्यांनी कामराचा शो झाला त्या सेटची तोडफोड केली. यानंतर वाद पेटला आणि सत्ताधारी आमदारांकडून कुणाल कामराला अटक करण्याची मागणी केली जातेय. मुख्यमंत्री देवेंद्र फडणवीस यांनीदेखील याची दखल घेतली असून कारवाईचा इशारा दिला आहे. त्यातच आता उद्धव ठाकरे यांनी यावर भाष्य केलं आहे.
कामरा नेमकं काय म्हणाला होता?
“महाराष्ट्राच्या निवडणुकीत यांनी काय केलं आहे पाहा. शिवसेना भाजपामधून बाहेर आली. मग शिवसेना शिवसेनेतून बाहेर आली. राष्ट्रवादी राष्ट्रवादीमधून बाहेर आली. एका मतदाराला 9 बटणं दिली. सगळेच गोंधळून गेले. मुंबईतील ठाणे जिल्ह्यातील एकाने सुरु केलं होतं,” असं म्हणत कुणालने पुढे ‘भोली सी सुरत, आँखो मे मस्ती’ गाण्याच्या चालीवर एक गाणं सादर केलं. यामध्ये त्याने ठाण्यातील रिक्षा, चेहऱ्यावर दाढी, डोळ्यावर चष्मा असा उल्लेख गाण्यामधून केला आहे. तसेच पुढे बोलताना, “एक झलक दाखवून कधी गुवहाटीमध्ये लपले,” असंही म्हटलं आहे. शिवसेनेत फूट पडल्यानंतर एकनाथ शिंदे बंडखोर आमदारांबरोबर काही काळ गुवहाटीमध्ये वास्तव्यास असल्याचा संदर्भ यामधून देण्याचा प्रयत्न कामराने केला. याच गाण्याच्या चालीत कामराने, “माझ्या नजरेतून पाहिलं तर ती व्यक्ती गद्दार आहे,” असंही म्हटलं आहे. “मंत्री नाही तर ती व्यक्ती पक्ष बदलणारी आहे, अजून काय सांगू?” असंही कामराने म्हटलंय. “ज्या थाळीत खाल्लं त्याच थाळीत त्यांनी छिद्र केलं,” असंही कामराने या गाण्यात म्हटलं आहे. “राजकीय परिवारवाद संपवायचा होता म्हणून यांनी बाप चोरला असं यांचं राजकारण आहे,” असं कामराने गाण्यात म्हटलं आहे.
काय म्हणाला कुणाल कामरा?
Going to an address where I haven’t lived for the last 10 Years is a waste of your time & public resources… pic.twitter.com/GtZ6wbcwZn
— Kunal Kamra (@kunalkamra88) March 31, 2025
कुणाल कामरा याने माफी मागावी असे आवाहन मुख्यमंत्री देवेंद्र फडणवीस यांनी केले होते. पण मी माफी मागणार नाही, असे प्रत्युत्तर कुणाल कामरा याने दिले होते. दरम्यान मुंबई पोलीस कुणाल कामराच्या मागावर आहेत. त्यांनी कुणाल कामराच्या मुंबईतील घरी त्याचा शोध घेतला. या पार्श्वभूमीवर कुणाल कामराने सोशल मीडियात पोस्ट केली आहे. ‘मागच्या 10 वर्षांपासून मी जिथे राहत नाही अशा पत्त्यावर जाणे म्हणजे तुमचा वेळ आणि सार्वजनिक संसाधनांचा अपव्यय आहे’, असे कुणाल कामराने आपल्या पोस्टमध्ये म्हटलंय.
कोट्यावधी रुपयांची मदत
कुणाल कामराला देशविदेशातून वाढता पाठिंबा मिळताना दिसत आहे. एकीकडे कुणाल कामरावर माफीसाठी दबाव टाकला जात आहे. याचवेळी कुणालच्या कायदेशीर लढ्यासाठी जगभरातून आर्थिक मदतीचा ओघ सुरू झाला असून दोन दिवसांत त्याच्या खात्यात तब्बल चार कोटी रुपयांहून अधिक रक्कम जमा झाली आहे. कुणालने महाराष्ट्रातील फोडाफोडीच्या राजकारणावर भाष्य केले, अशी उत्स्फूर्त प्रतिक्रिया महाराष्ट्र- भारतासह इतर देशांतील चाहतेही व्यक्त करीत आहेत. याचवेळी कुणालचा कायदेशीर लढा बळकट करण्यासाठी जगभरातील चाहत्यांकडून आर्थिक मदतीचा तुफान ओघ सुरू झाला आहे. या मदतीच्या रूपात दोन दिवसांत कुणालच्या खात्यात तब्बल 4 कोटी 7 लाख 80 हजार रुपये जमा झाल्याची माहिती समोर आली आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
