महाराष्ट्रातील हिवाळी अधिवेशन अनेक मुद्द्यांवरून गाजले होते. परंतु, त्यात विशेष लक्ष वेधले गेले तत्कालीन कृषिमंत्री माणिकराव कोकाटे यांचे सभागृहातच मोबाइलवर रम्मी खेळण्याच्या व्हिडिओने. माणिकराव कोकाटे यांचा सभागृहात रम्मी खेळतानाचा व्हिडिओ राष्ट्रवा
.
माणिकराव कोकाटे यांचा रम्मी खेळतानाचा व्हिडिओ ट्विट केल्याने आमदार रोहित पवारांना कायदेशीर नोटीस पाठवण्यात आली असून याबद्दल पवारांनी ट्विट करत माहिती दिली आहे. ते म्हणाले, माजी कृषिमंत्र्यांचा सभागृहात पत्ते खेळतानाचा व्हिडीओ जगजाहीर केला म्हणून मला मानहानीच्या दाव्याची नोटीस आली आहे. कोकाटे साहेब तुमचा काळ आला होता पण वेळ आली नव्हती, त्यामुळे एवढे मोठे कांड करूनही वाचलात. मानहानीची एवढी काळजी होती तर पत्ते खेळण्याचे कुटाणे केलेच कशाला? शेतकऱ्यांप्रती असलेला आपला कळवळा आणि आपण केलेले पराक्रम सांगण्याची वेगळी गरज नाही, असे म्हणत कोकाटेंवर निशाणा साधला आहे.
पुढे रोहित पवार म्हणाले, तुम्ही पाठवलेली नोटीस मजेशीर आहे, नोटीस वाचून हसू आवरता आले नाही. पण लक्षात ठेवा, पुराव्याशिवाय मी बोलत नाही. तुम्ही पत्ते खेळत होतात हे मी पुराव्यासकट प्रुफ केले होते आणि उद्या देखील पुराव्यासकट प्रुफ करेल, असे म्हणत पवारांनी इशारा दिला आहे.
काय आहे नेमके प्रकरण?
राज्य मंत्रिमंडळाचे पावसाळी अधिवेशन सुरू असताना तत्कालीन कृषिमंत्री माणिकराव कोकाटे हे सभागृहात मोबाइलवर रम्मीचा गेम खेळत होते. याचा व्हिडिओ रोहित पवारांनी प्रसिद्ध केला होता. त्यानंतर विरोधकांनी सरकारवर जोरदार टीका करण्यास सुरुवात केली होती. तसेच माणिकराव कोकाटे यांचा राजीनामा घेण्यात यावा अशी देखील मागणी विरोधकांनी तसेच शेतकरी संघटनांनी केला होता. वाढता विरोध पाहता उपमुख्यमंत्री अजित पवार यांनी माणिकराव कोकाटे यांच्याकडून कृषी खाते काढून घेत त्यांना क्रीडा खाते दिले.
मी रम्मी खेळतच नव्हतो – माणिकराव कोकाटे
टीकेची झोड उठल्यावर माणिकराव कोकाटे यांनी पत्रकार परिषद घेत स्पष्टीकरण दिले होते. तेव्हा ते म्हणाले की, मी खालच्या सभागृहात नेमके काय चालले आहे, ते युट्यूबवर पाहण्यासाठी फोन सुरु केला होता. पण त्यावर कोणीतरी हा गेम डाऊनलोड केला होता, ती जाहिरात तो गेम स्कीप करत होतो, तेव्हा कोणीतरी तो व्हिडीओ काढला असेल. मी काय चोरी केलेली नाही किंवा शेतकऱ्याविरोधात भाष्य केले आहे किंवा अजून काही केलेले आहे, असे नाही.
मी ते स्कीप करत होतो, तेव्हा हे घडले. तुमच्याही मोबाईलवरही जाहिराती येतात. युट्यूब सुरु केले तर त्यावर तुम्हालाही जंगली रमीची जाहिरात येते. गाण्याच्या जाहिराती येतात. कोणत्याही प्रकारच्या जाहिराती येतात. अशाप्रकारच्या जाहिराती येणे हे अपरिहार्य आहे, ते रोहित पवारांच्या मोबाईलवर येत नाहीत का, त्यांच्याही मोबाईलवर येतात. पण कोणत्या गोष्टीचे भांडवल करावे, कोणत्या गोष्टीचे भांडवल करु नये, हे रोहित पवारांना कळायला हवे. उगाचच ते स्वत:ची करमणूक करुन घेतात, असे म्हणत त्यांनी रोहित पवारांवर पलटवार केला होता.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
