मुंबईच्या छत्रपती शिवाजी महाराज टर्मिनस येथे रेल्वे कर्मचाऱ्यांनी केलेल्या आंदोलनामुळे मध्य रेल्वे मार्गावरील लोकल वाहतूक विस्कळीत झाली असताना, मुंबईत एक अत्यंत दुर्दैवी अपघात घडला आहे. सँडहर्स्ट रोड स्टेशनजवळ रुळांवरून पायी चालणाऱ्या चार प्रवाशांना
.
कर्मचारी आंदोलनाचा प्रवाशांना फटका
रेल्वे कर्मचाऱ्यांनी केलेल्या आंदोलनामुळे लोकल सेवा बंद होती आणि त्यामुळे सर्वच स्थानकांवर प्रचंड गर्दी वाढली होती. लोकलसेवा बंद असल्याने हे चार प्रवासी सँडहर्स्ट रोड स्टेशनजवळ रुळांवरून चालत होते, त्याच वेळी अचानक आलेल्या लोकलने त्यांना उडवले.
मध्य रेल्वेचे जनसंपर्क अधिकारी काय म्हणाले?
घटनेबाबत बोलताना मध्य रेल्वेचे जनसंपर्क अधिकारी म्हणाले, सँडहर्स्ट रोड स्टेशनवर काही प्रवासी चालले होते. त्यांना अंबरनाथ फास्ट ट्रेनने धडक दिली. आत्तापर्यंत जी माहिती समोर आली आहे त्यानुसार तिघांना धडक लागली आहे.
मध्य रेल्वेची वाहतूक विस्कळीत
सीएसएमटीवरून लोकल वाहतूक विस्कळीत झाल्यामुळे कामावरून घरी जाणाऱ्या चाकरमान्यांचे प्रचंड हाल होत आहेत. रेल्वे कर्मचाऱ्यांच्या आंदोलनाचा फटका ठाणे रेल्वे स्थानकावरील प्रवाशांनाही बसला आहे. मध्य रेल्वे मार्गावरील लोकल सध्या 40 ते 45 मिनिटे उशिराने धावत असून, अप आणि डाऊन दोन्ही मार्गांवर वाहतूक विस्कळीत झाली आहे.
आंदोलनाचे कारण काय?
मुंब्रा येथे झालेल्या एका अपघाताप्रकरणी लोहमार्ग पोलिसांनी दोन अभियंत्यांवर गुन्हे दाखल केल्याच्या निषेधार्थ रेल्वे कर्मचारी संघटनांनी आज मुंबईतील छत्रपती शिवाजी महाराज टर्मिनस येथे तीव्र आंदोलन केले. या आंदोलनात एनआरयूएम संघटनेच्या कर्मचाऱ्यांनी सायंकाळी मोर्चा काढला. तसेच, मोटरमन देखील आंदोलनात सहभागी झाल्यामुळे मध्य रेल्वे आणि हार्बर मार्गावरील लोकलसेवा ठप्प झाली. लोकल थांबल्याने सीएसएमटी स्थानकावर अनेक लोकल उभ्या होत्या आणि प्रवाशांना मोठा त्रास सहन करावा लागला.
संध्याकाळच्या ‘पीक आवर’मध्ये झालेल्या या आंदोलनामुळे लोकल वाहतूक पावणेसहा वाजेपर्यंत थांबली होती. रेल्वे प्रशासनाने तातडीने रेल्वे युनियनसोबत बोलणी सुरू केली. लोकल सेवा त्वरित पूर्ववत व्हावी, यासाठी डीआरएम आणि अन्य वरिष्ठ अधिकाऱ्यांनी आंदोलकांशी चर्चा केली. रेल्वेचे जनसंपर्क अधिकारी स्वप्नील लीला यांनी दिलेल्या माहितीनुसार, आंदोलकांसोबत यशस्वी बोलणी झाल्यानंतर सुमारे पावणेसात वाजता लोकल सेवा पुन्हा सुरू करण्यात आली.
जीआरपीने अभियंत्यांविरोधात दाखल केलेल्या केसच्या विरोधात हे आंदोलन होते. प्रशासनाच्या मध्यस्थीनंतर हे आंदोलन थांबवण्यात आले आहे. तथापि, पावणेसहा ते पावणेसात या वेळेत लोकल सेवा ठप्प असल्याने, सध्या मध्य आणि हार्बर मार्गावरील लोकल सेवा उशिराने सुरू राहील, अशी माहिती जनसंपर्क अधिकारी स्वप्नील लीला यांनी दिली आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
