Mumbai Road Accident: जोगेश्वरी-विक्रोळी लिंक रोडवर झालेल्या एका भीषण अपघातामध्ये भरधाव वेगातील टेम्पोने एका महिलेला चिरडल्याची घटना घडली आहे. या अपघातामध्ये महिलेचा मृत्यू झाला आहे. गुरुवारी रात्री जोगेश्वरी-विक्रोळी लिंक रोड (जेव्हीएलआर) वरील अपघात प्रकरणामध्ये टेम्पो चालकाला पोलिसांनी अटक केली आहे. जोगेश्वरी येथील रहिवासी 33 वर्षीय चंदा माने कामावरून घरी परतत असताना सुनील कुमार भारती (33) नावाच्या चालकाने टेम्पोने तिला चिरडले.
आम्ही सारं काही गमावलं
चंदा माने बीकेसीमधील एका फर्ममध्ये नोकरी करत होत्या. चंदा माने नियमितपणे क्लायंट मीटिंगसाठी शहरात फिरतीवर असायच्या. त्या दररोज दुचाकीवरून ये-जा करत असे. चंदाचा भाऊ यज्ञेश मानेने, “आम्ही 2 मे रोजी तिचा वाढदिवस साजरा केला होता. ती खूप आनंदी आणि समाधानी व्यक्ती होती. या दुर्घटनेत आम्ही तिच्या जाण्याने सर्वस्व गमावले आहे,” असं ‘मिड-डे’शी बोलताना सांगितलं.
पवईवरुन येताना अपघात
यज्ञेशने या अपघातामध्ये बहिणीची काहीही चूक नसल्याचं म्हटलं आहे. “माझी बहीण नेहमीच दुचाकी सुरक्षितपणे चालवायची. गुरुवारी, ती पवई येथून रात्री आठ-साडेआठच्या सुमारास एका मिटींगवरुन परत येत होती. ती घरी परत येत असताना जेव्हीएलआरवर अचानक एका टेम्पोने तिला ओव्हरटेक करण्याचा प्रयत्न केला. त्या टेम्पोने तिच्या बाईकला धडक दिली आणि ती खाली पडली. टेम्पो तिच्या डोक्यावरून गेला आणि तिचा जागीच मृत्यू झाला,” असं यज्ञेशने म्हटलं आहे.
ऑफिसमध्ये असताना आला फोन
मी संध्याकाळच्या शिफ्टमध्ये काम करत असताना मला माझ्या मित्राचा फोन आला त्याने मला चंदाचा अपघात झाल्याचं सांगितल्याचं यज्ञेश म्हणाला. “तिला तातडीने कूपर हॉस्पिटलमध्ये नेण्यात आले, जिथे डॉक्टरांनी तिला मृत घोषित केले. आमच्या कुटुंबासाठी हे सारं फार धक्कादायक आहे,” असं यज्ञेशने सांगितलं. चंदाच्या कुटुंबाला या साऱ्या प्रकरणामध्ये मोठा मानसिक धक्का बसला आहे.
पोलीस काय म्हणाले?
एमआयडीसी पोलिस स्टेशनचे वरिष्ठ निरीक्षक राजीव चव्हाण यांनी, “आम्ही टेम्पो चालकाविरुद्ध मोटार वाहन कायद्याच्या कलम 184 [धोकादायक वाहन चालवणे], 134 (अ) आणि 134 (ब) [अपघात झाल्यास चालकाच्या कर्तव्यांशी संबंधित] आणि भारतीय न्याय संहिता (बीएनएस) च्या कलम 106 (१) [निष्काळजीपणामुळे मृत्यूस कारणीभूत] आणि 281 [अविचारीपणे वाहन चालवणे/स्वारी चालवणे] अंतर्गत एफआयआर नोंदवला आहे. आरोपी सुनील कुमार भारती याला निष्काळजीपणे वाहन चालवल्याबद्दल अटक करण्यात आली आहे,” अशी माहिती दिली.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
