Sanjay Raut on Narendra Modi: पंतप्रधान नरेंद्र मोदी सप्टेंबरमध्ये निवृत्त होणार असून, त्याचा अर्ज लिहिण्यासाठीच नागपूरच्या संघ मुख्यालयात गेले होते असा दावा खासदार संजय राऊत यांनी केला आहे. मोहन भागवत आणि संपूर्ण संघ कुटुंब देशाच्या नेतृत्वात बदल अपेक्षित करत आहे असंही ते म्हणाले आहेत. तसंच मोदींचा वारसदार संघ ठरवेल असं दिसत आहे. संघ पुढील नेता ठरवेल आणि तो बहुतेक महाराष्ट्रातील असेल असाही मोठा दावा त्यांनी मुंबईत प्रसारमाध्यमांशी बोलताना केला आहे.
“नरेंद्र मोदी सप्टेंबरमध्ये निवृत्त होत असल्याचा अर्ज लिहिण्यासाठी ते बहुतेक संघाच्या मुख्यालयात गेले होते. माझ्या माहितीनुसार, 10-12 वर्षात ते कधी गेले नाहीत. ते मोहन भागवतांना आता मी जात आहे हे सांगण्यास गेले होते. मोहन भागवत आणि संपूर्ण संघ कुटुंब देशाच्या नेतृत्वात बदल अपेक्षित करत आहे. मोदींची वेळ संपली असून देशात बदल अपेक्षित करत आहे. भाजपाचा राष्ट्रीय अध्यक्षही आपल्या स्वेच्छेने निवडण्याची इच्छा आहे. त्यासाठी मोदी गेले होते. नरेंद्र मोदी जात आहेत,” असं संजय राऊत म्हणाले आहेत.
पुढे त्यांनी सांगितलं की, “नरेंद्र मोदी-मोहन भागवत यांच्या भेटीचे संकेत स्पष्ट आहेत. नरेंद्र मोदी यांनी 75 वर्ष झालेल्यांनी सत्तेच्या पदावर राहू नये असं धोरण जाहीर केलं होतं. त्यामुळे सरसंघचालकांनी त्यांना त्यांच्या भूमिकेची आठवण करुन देण्यासाठी त्यांच्याशी चर्चा केली. सप्टेंबर महिना येत असून, देशाचं नेतृत्व बदलावं लागेल. दुसरीकडे भाजपाच्या राष्ट्रीय अध्यक्षपदासाठीही संघाची एक भूमिका असल्याचं समोर आलं आहे. त्यानुसार संघाला हवी असलेली व्यक्ती भाजपाच्या अध्यक्षपदी यावी अशी संघाची भूमिका स्पष्ट दिसत आहे”.
“ज्या अर्थी मोदींना नागपुरातत जाऊन सरसंघचालकांना भेटावं लागलं ही साधी गोष्ट नाही. नड्डा यांनी तर 400 पार करण्यासाठी संघाची गरज नाही असं म्हटलं होतं. जेव्हा राष्ट्रीय अध्यक्ष बोलतो तेव्हा ती पंतप्रधान मोदींची भूमिका असते. त्यामुळे त्यांना मुख्यालयात का जावं लागलं हे स्पष्ट आहे,” असा अंदाज संजय राऊत यांनी वर्तवला आहे.
“मोदींचा वारसदार संघ ठरवेल असं दिसत आहे. संघाची चर्चा बंद दाराआड असते. बंद दाराआड झालेली चर्चा बाहेर येत नाही. पण काही संकेत स्पष्ट असतात. संघ पुढील नेता ठरवेल आणि तो बहुतेक महाराष्ट्रातील असेल,” असंही ते म्हणाले.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
