लेडीज टॉयलेटमध्ये कोणीतरी चादरीच्या छिद्रातून…; पुण्यातल्या हॉटेलात विचित्र प्रकार, पोलिसही थक्क

Pune Crime News: गुरुवारी पुण्यातील हडपसर येथील एका हॉटेलमध्ये एक अत्यंत धक्कादायक प्रकार समोर आला. येथील एक महिला टॉयलेट वापरण्यासाठी गेली असता तिला कोणीतरी तिच्याकडे लपून पाहत असल्याचा संशय आला. या हॉटेलमधील टॉयलेटच्या भिंतींकडे निरखून पाहिल्यानंतर तिला एक विचित्र गोष्ट जाणवली. महिलांचं हे टॉयलेट पुरुषांच्या शौचालयाशेजारी होतं. पुरुष आणि महिलांच्या टॉयलेटमध्ये केवळ चादर टाकून पार्टिशन करण्यात आलं होतं. याच चादरीमागे एक पुरुष लपून टॉयलेट वापरणाऱ्या महिलांचं शुटींग करत होता. या महिलेने ताबडतोब पोलिसांना ही बाब कळवली. पोलिसांनी प्रकरणाचं गांभीर्य लक्षात घेत तातडीने कारवाई करत आरोपीला अटक केली. या आरोपीचं नाव भीमाशंकर तिप्पन्ना चरवाडी असं असल्याची माहिती समोर आली आहे.

आरोपी परप्रांतीय

भीमाशंकर तिप्पन्ना चरवाडी हा 32 वर्षीय इसम मूळचा कर्नाटकचा रहिवासी आहे. महिलेने दाखल केलेल्या तक्रारीच्या आधारे, पोलिसांनी संबंधित कलमांखाली आरोपीवर गुन्हा दाखल केला आहे. 22 मे रोजी दुपारी अडीच वाजण्याच्या सुमारास हा सारा प्रकार घडल्याची माहिती पोलिसांनी दिल्याचं ‘पुणे मिरर’च्या वृत्तात म्हटलं आहे. 

नेमकं या महिलेसोबत घडलं काय?

पोलिसांनी दिलेल्या माहितीनुसार, पीडित महिला हडपसरमधील कालिका हॉटेल (बेकरी) येथील टॉयलेमध्ये गेली होती. टॉयलेटमध्ये असताना या महिलेच्या लक्षात आले की कोणीतरी या टॉयलेटचं पार्टीशन म्हणून वापल्या जाणाऱ्या चादरीला असलेल्या छिद्रामधून तिचं लपून छपून चित्रकरण करत आहे. हा प्रकार लक्षात आल्यानंतर महिलेला धक्काच बसला. तिने कसं बसं स्वत:ला सावरलं. मात्र आरोपी सावध होईल असा विचार करुन तिने आरडाओरड न करता तिथून काढता पाय घेतला. बाहेर आल्यानंतर तिने पोलिस नियंत्रण कक्षाला घटनेची माहिती दिली. हडपसर पोलिस ठाण्याचे वरिष्ठ निरीक्षक संजय मोगले यांनी घटनास्थळी धाव घेतली आणि आरोपीला ताब्यात घेतले.

फोन तपासला असता पोलिसांना धक्काच बसला

पोलिसांनी त्याचा फोन तपासला असता त्यांना धक्काच बसला. या फोनमध्ये पीडित महिलेचा टॉयलेटमधील व्हिडीओ पोलिसांना आढळून आला. महिलेचा व्हिडिओ सापडला. आरोपीने यापूर्वी इतर महिलांचेही असे व्हिडिओ चित्रित केले आहेत का याचा शोध पोलीस सध्या घेत आहेत.

गुजरातमध्येही घडलेला असाच प्रकार

गुजरातमध्येही गेल्या महिन्यात अशीच घटना घडली होती. सय्यगंज पोलिसांनी या प्रकरणामध्ये एका पुरूषाला अटक केलेली. हा पुरुष एका महिलेला आंघोळ करताना पाहत होता आणि तिच्या नकळत तो ती अंघोळ करत असतानाचा व्हिडिओ काढण्याचा प्रयत्न करत होता. या प्रकरणातील 28 वर्षीय पीडित महिलेने संपूर्ण घटनाक्रम सांगितला. पीडित महिला तिच्या घरात आंघोळ करत असताना तिला खिडकीत एक मोबाईल फोन दिसला. तीने आजूबाजूला वाकून पाहिलं असता तिला कोणीही आढळले नाही. मात्र घराच्या समोर लावलेल्या सीसीटीव्ही फुटेजमध्ये आरोपी पठाण हा मोबाईल घेऊन घराजवळून जात असल्याचे दिसून आले. त्यानंतर महिलेने तिच्या शेजाऱ्यांना घटनेबद्दल सांगितले आणि त्याच्याविरुद्ध तक्रार दाखल केली.