वसमत ते परभणी मार्गावर चिखलीपाटी जवळ आत्ता पोलिसांच्या पथकाने तीन वाहनांसह 25 जनावरे असा एकूण 27 लाख 44 हजार रुपयांचा मुद्देमाल जप्त केला आहे. याप्रकरणी हट्टा पोलीस ठाण्यात सायंकाळी उशिरा तिघांवर गुन्हा दाखल झाला आहे.
.
पोलिसांनी दिलेल्या माहितीनुसार वसमत तालुक्यातील काही गावांमधून तीन वाहनांमध्ये जनावरे भरून सदर वाहने परभणीकडे नेली जात असल्याची माहिती हट्टा पोलिसांना मिळाली होती. त्यावरून पोलीस अधीक्षक श्रीकृष्ण कोकाटे, अप्पर पोलीस अधीक्षक अर्चना पाटील, उपाधिक्षक राजकुमार केंद्रे यांच्या मार्गदर्शनाखाली हट्टा पोलीस ठाण्याचे सहाय्यक पोलीस निरीक्षक संग्राम जाधव, उपनिरीक्षक युवराज गवळी, जमादार ताम्रध्वज कासले, सचिन सांगळे, किरण धोत्रे, महेश अवचार, प्रीतम चव्हाण यांच्या पथकाने आज दुपारी वाहनांची तपासणी सुरू केली होती.
दरम्यान दुपारी एक वाजण्याच्या सुमारास दोन आयशर व एक पीक अप वाहन पोलिसांनी थांबवले. पोलिसांनी चालकाकडे विचारणा केली असता चालकांनी उडवा उडवीची उत्तरे दिली. त्यामुळे पोलिसांना संशय आल्याने पोलिसांनी वाहनांची तपासणी केली यामध्ये तीन वाहनांमध्ये एकूण 25 जनावरे दाटीवाटीने कोंबलेली आढळून आली. पोलिसांनी जनावरांच्या वाहतुकीचा परवाना तसेच इतर कागदपत्राची मागणी केली असता कुठल्याही प्रकारची कागदपत्रे चालकांना सादर करता आली नाही.
त्यामुळे पोलिसांनी तीन वाहने व 25 जनावरे असा 27 लाख 44 हजार रुपयांचा मुद्देमाल जप्त केला. याप्रकरणी सहाय्यक पोलीस निरीक्षक संग्राम जाधव यांनी दिलेल्या तक्रारीवरून हट्टा पोलिसांनी मोहम्मद तौफिक (रा.उस्मनिया कॉलनी परभणी), शेख मुकद्दर व शेख समीर (रा खंडोबा बाजार परभणी) यांच्याविरुद्ध गुन्हा दाखल केला आहे. पोलिसांनी जप्त केलेली जनावरे नांदेड जिल्ह्यातील कामठा येथील गोशाळेमध्ये रवाना केली आहेत. सहाय्यक पोलीस निरीक्षक संग्राम जाधव, उपनिरीक्षक युवराज गवळी पुढील तपास करीत आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
