वादळी वाऱ्यामध्ये वीज कंपनीच्या पोल उभारणीची पोलखोल: जिल्ह्यात 90 पोल पडल्याने 22 लाखांचे नुकसान, वीज पुरवठाही विस्कळीत – Hingoli News

.

हिंगोली जिल्ह्यात वीज कंपनीच्या वतीने शासनाच्या विविध योजनेतून कृषीपंपांना वीज जोडणी देण्यात आली आहे. यामध्ये पोल उभारणी, वीज वाहिन्या उभारणी, डीपी बसविणे यासह इतर कामांचा समावेश आहे. त्यासाठी वीज कंपनीकडून कंत्राटदारांची नियुक्ती करून त्यांच्याकडून ही कामे करून घेण्यात आलेली आहेत.

मात्र सदरील कामे करतांना कंत्राटदारांनी अतिशय थातूरमातूर पध्दतीने कामे केली असल्याचा आरोप शेतकऱ्यांतून करण्यात आला आहे. अनेक ठिकाणी खांब उभारणीसाठी खड्ड्याची खोली कमी असणे, त्यात सिमेंट कॉँक्रीट न भरणे असे आरोप शेतकऱ्यांतून करण्यात आला आहे. मात्र शेतकऱ्यांच्या या तक्रारीकडे वीज कंपनीच्या अधिकाऱ्यांनी साफ दुर्लक्ष केले आहे.

दरम्यान, हिंगोली जिल्ह्यात मागील दोन ते तीन दिवसांत वादळी वारे झाले आहेत. तर काही भागात जोरदार पाऊस देखील झाला आहे. या वादळी वाऱ्यामुळे वीज कंपनीचे प्रचंड नुकसान झाले आहे. यामध्ये 80 ते 90 ठिकाणी खांब कोसळले असून वीज वाहिन्या तुटून पडल्या आहे. तर काही भागात रोहित्र पडले आहे. त्यामध्ये 22 लाख रुपयांचे नुकसान झाल्याचा प्राथमिक अंदाज आहे. अद्यापही नुकसानीची पाहणी करण्याचे काम सुरु असून नुकसानीचा आकडा वाढण्याची शक्यता असल्याचे सुत्रांनी सांगितले.

हिंगोली जिल्ह्यात पावसाळ्यापूर्वीच वीज कंपनीकडून उभारण्यात आलेल्या विद्युत पोलच्या कामाची पोलखोल झाली असून वीजेचे पोल कोसळल्यामुळे वीज पुरवठा विस्कळीत झाला तर शेतकऱ्यांनाही मानसीक त्रास सहन करावा लागला आहे. त्यामुळे आता काही दिवसांपूर्वीच उभारण्यात आलेल्या पोलची तपासणी करण्याची मागणी पुढे येऊ लागली आहे.

कोसळलेले पोल जूने होते

वीज कंपनी कार्यकारी अभियंता आर. एन. चव्हाण म्हणाले की, जिल्ह्यात पोल कोसळून झालेल्या नुकसानीची माहिती येत आहे. सध्या काही माहिती प्राप्त झाली आहे. जंगलाच्या परिसरात कोसळलेल्या पोलची माहिती घेण्याचे काम सुरु आहे. त्यामुळे पूर्णपणे पाहणी झालेली नाही. तर कोसळलेले पोल हे जूने 20 वर्षापूर्वी बसविले आहेत.