विधानभवनात आमदारांकडूनच सुरक्षा नियमांचा भंग: पोलिसांनी विधानसभा अध्यक्षांना पाठवला अहवाल, राहुल नार्वेकरांनी दिल्या कडक सूचना – Mumbai News

.

विधानसभा सुरक्षेतील पोलिसांनी विधानसभा अध्यक्षांकडे सादर केलेल्या अहवालात म्हटले की, अनेक आमदार सभागृहात जाण्यापूर्वी विधानभवनाच्या लॉबीत आपल्या कार्यकर्त्यांना सोबत घेऊन येतात. याठिकाणी कागदपत्रांवर स्वाक्षऱ्या केल्या जातात, तसेच फोटो सेशन्सही घेतले जातात. ही कृती कोणत्याही एका पक्षापुरती मर्यादित नसून सर्वच पक्षांतील आमदारांकडून अशा घटना घडत असल्याचे निदर्शनास आले आहे. याबाबतचे वृत्त ‘एबीपी माझा’ने दिले आहे.

नियम पायदळी, सुरक्षा रक्षकांची अडचण

लॉबीत प्रवेशासंबंधी स्पष्ट नियम असून, केवळ अधिकृत शासकीय स्वीय सहाय्यकांनाच आमदारांसोबत प्रवेश दिला जाऊ शकतो. मात्र प्रत्यक्षात कार्यकर्ते आणि इतर लोक उपस्थित राहतात. सुरक्षा रक्षक या नियमांचे पालन करण्याचा प्रयत्न करताच, त्यांना कारणे देऊन दुर्लक्ष केले जाते, असेही अहवालात नमूद करण्यात आले आहे.

पासशिवाय वाहनांना विधानभवनात प्रवेश

तसेच अनेक आमदार आपल्या गाडीतून विधानभवनात पास नसताना एन्ट्री देत असल्याचे देखील समोर आले आहे. आमदारांची सुरक्षा लक्षात घेता याबाबत वेळोवेळी सूचना करून देखील आमदार ऐकत नसल्यानेच याबाबतचा अहवाल विधानसभा अध्यक्षांकडे देण्यात आल्याची माहिती सूत्रांकडून मिळत आहे.

विधानसभा अध्यक्षांच्या सूचना

दरम्यान, याबाबत ओळखपत्र पाहिल्याशिवाय कुणालाही विधानभवनात सोडू नये, अशा सूचना विधानसभा अध्यक्ष राहुल नार्वेकर यांनी मंत्रालय सुरक्षा पोलिसांना दिल्या आहे. तर विधानसभा आणि विधान परिषद या दोन्ही ठिकाणी आणि सदस्य लॉबीतही फक्त स्वीय सहाय्यकांना ओळखपत्र तपासूनच सोडण्यात यावे, असा सूचना विधानसभा अध्यक्षांनी दिल्याची माहिती समोर येत आहे.

हे ही वाचा…