कळमनुरी येथील तांबोळी गल्ली भागातील एका तरुणाने विवाह होत नसल्यामुळे देवदरी शिवारात गळफास घेऊन आत्महत्या केल्याची घटना घडली आहे. याप्रकरणी कळमनुरी पोलिस ठाण्यात सोमवारी ता. 24 सायंकाळी अकस्मात मृत्यूची नोंद करण्यात आली आहे.
.
पोलिसांनी दिलेल्या माहितीनुसार, कळमनुरी शहरातील तांबोळी गल्ली भागात गजानन बंडूअप्पा व्यवहारे (३०) हा तरूण त्याचे आई-वडील व भावासोबत राहतो. गजानन याचे शिक्षण इयत्ता दहावीपर्यंत झाले. त्यानंतर त्याने शेती करण्याचा निर्णय घेतला. मागील काही दिवसापासून तो शेती करत होता. त्याचा विवाह करण्यासाठी त्याच्या आई-वडिलांनी काही ठिकाणे देखील बघितली होती. मात्र, त्याचा विवाह योग जुळून येत नव्हता. विवाह योग येत नसल्यामुळे तो मागील काही दिवसांपासून अस्वस्थ झाला होता
दरम्यान, माझ्यासाठी मुलगी पहा माझा विवाह करा असा तो त्याच्या आई-वडिलांना वारंवार बोलत होता. मात्र त्याचा विवाह योग जुळून आलाच नाही. त्यानंतर आज सकाळी तो देवदरी शिवारातील शेतामध्ये गेला होता. दुपारी बारा वाजण्याच्या सुमारास त्याने शेतात गळफास घेऊन आत्महत्या केली.
मयत गजानन याचा मृतदेह झाडाला लटकलेल्या अवस्थेत दिसल्यानंतर त्याच्या नातेवाईकांनी सदर प्रकार गजानन याच्या काकाला सांगितला. त्यानंतर त्यांचे कुटुंबीय घटनास्थळी दाखल झाले. या घटनेची माहिती मिळाल्यानंतर कळमनुरी पोलिस ठाण्याचे पोलिस निरीक्षक मोहन भोसले, जमादार राठोड, प्रशांत शिंदे, गजानन होळकर,कैलास सातव यांच्या पथकाने तातडीने घटनास्थळी धाव घेतली. पोलिसांनी मयत गजानन याचा मृतदेह उत्तरीय तपासणीसाठी कळमनुरीच्या उपजिल्हा रुग्णालयात दाखल केला.
याप्रकरणी खंडू व्यवहारे यांनी दिलेल्या माहितीवरून कळमनुरी पोलिस ठाण्यात अकस्मात मृत्यूची नोंद करण्यात आली आहे. जमादार राठोड पुढील तपास करीत आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
