राष्ट्रवादी कॉंग्रेस पक्षाचे संस्थापक व शरद पवार गटाचे अध्यक्ष शरद पवार यांचे स्वीय सहायक तुकाराम धुवाळी यांचे निधन झाले आहे. गेल्या 53 वर्षांपासून शरद पवार यांचे स्वीय सहायक म्हणून त्यांनी काम केले. शरद पवार हे गेल्या 60 वर्षांपासून राजकारणात आहेत,
.
शरद पवार यांनी ट्विट करत तुकाराम धुवाळी यांचे निधनाची बातमी दिली असून आपल्या भावना व्यक्त केल्या आहेत. शरद पवार म्हणाले, मी 1972 पासून सार्वजनिक जीवनात सक्रिय झाल्यापासून ज्यांनी माझ्या स्वीय सहाय्यकाची जबाबदारी स्वीकारली ती तुकाराम धुवाळी यांनी. आणि ही जबाबदारी त्यांनी त्यांच्या शेवटच्या श्वासापर्यंत कार्यरत राहून सांभाळली. अतिशय विश्वासू, प्रामाणिक व सचोटीने वागणारा, नीगर्वी तसेच सतत हसतमुख असणारा, प्रत्येक व्यक्तीशी आदराने वागणारा, प्रत्येकाचे काम पूर्ण होण्यासाठी यथाशक्ती प्रयत्न करणारा, अशा निराळ्या सहकाऱ्याचे देहावसान झाले याचे मला अत्यंतिक दु:ख होत आहे.
आपल्या कामाचा व्याप जसा वाढत जातो तेव्हा अशी काही माणसे जवळ असावी लागतात की ज्यांच्या सहकार्याने आपण निश्चिंतपणे वेगवेगळ्या प्रकारची कामे करु शकतो. त्यांच्यावर सोपवलेली जबाबदारी ते निश्चिंतपणे, प्रामाणिकपणे पार पाडतात. त्यात आपल्याला मागे वळून पाहावे लागत नाही, अशातीलच धुवाळी होते. त्यांच्या जाण्याने कुटुंबातील एक व्यक्ती गेल्याचे दु:ख होते आहे. त्यांच्या आत्म्यास ईश्वर सद्गती देवो, अशा शब्दात शरद पवार यांनी भावना व्यक्त केल्या आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
