शालार्थ आयडी घोटाळ्याप्रकरणी संभाजी नगर शिक्षण मंडळाच्या सचिव व नागपूर विभागाच्या माजी शिक्षण उपसंचालक वैशाली जामदार यांना अटक करण्यात आली आहे. जामदार यांनीही बनावट कागदपत्रांच्या आधारे अपात्र शिक्षकांच्या नियुक्तीला मान्यता दिली असा, आरोप आहे.
.
शिक्षण मंडळाच्या सचिव वैशाली जामदार यांना यापूर्वी अनेकदा चौकशीसाठी बोलावण्यात आले होते. मात्र दर वेळी वेगवेगळी कारणे देऊन त्या गैरहजर राहिल्या. बनावट शालार्थ आयडी तयार करून बोगस शिक्षक भरती केल्या प्रकरणी सुरू असलेल्या चौकशीत सदर पोलिस रोज वेगवेगळ्या लोकांची चौकशी करीत आहेत. काहींना नोटीस पाठवून चौकशीला बोलावत आहेत. अटकेत असलेले शिक्षण उपसंचालक उल्हास नरड यांच्यापूर्वी वैशाली जामदार या नागपूरच्या विभागीय शिक्षण उपसंचालक होत्या. एका तक्रारीच्या अनुषंगाने सदर पोलिसांनी त्यांना चौकशीसाठी उपस्थित राहण्याची नोटीस बजावली होती.
मुन्ना वाघमारे यांनी केलेल्या तक्रारीवरून सदर पोलिसांनी फसवणुकीसह विविध कलमान्वये गुन्हा दाखल केला आहे. अन्य एक तक्रारदार हेमंत बांडेबुचे यांनी जामदार यांच्या विरोधात तक्रार दिली होती. काही शिक्षकांना जामदार यांनी सुद्धा शिक्षक मान्यता दिल्या असून, मान्य ठरावामध्ये फेरबदल करून खोटे नियुक्तीपत्र दिले, खोटे रुजू अहवाल दिले. खोट्या बनावट नियुक्त्या, पदोन्नती दाखवून शासनाची दिशाभूल केल्याचा आरोप केला आहे. त्यामुळे सदर गुन्ह्यांच्या अनुषंगाने आपल्या कार्यालयात किंवा आपणांद्वारे सुचविण्यात आलेल्या ठिकाणी किंवा सदर पोलिस ठाण्यात आपण सकाळी ११ वाजता चौकशीसाठी हजर राहावे’, असे पोलिसांनी दिलेल्या नोटीसमध्ये म्हटले होते. मात्र जामदार अनुपस्थित राहात होत्या.
यापूर्वी २२ मे रोजी सदर पोलिसांनी मुख्य आरोपी लक्ष्मण मंघाम याला घर सोडण्याच्या तयारीत असतानाच अटक करून सायबर पोलिसांच्या हवाली केले आहे. मंघाम यानेच उपसंचालक उल्हास नरड यांचा पासवर्ड चोरी करून घरी बसून बनावट शालार्थ आयडी तयार केले. मंघाम वाडी परिसरातील दाभा येथील वासंती अपार्टमेंटमधील ३०२ क्रमाकांच्या सदनिकेत राहात होता.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
