Amit Shah Raigad Speech: महाराष्ट्र दौऱ्यावर असलेल्या केंद्रीय गृहमंत्री अमित शाह यांनी किल्ले रायगडाला भेट दिली. अमित शाहांकडून छत्रपती शिवरायांना अभिवादन करण्यात आले. शाहांसोबत फडणवीस, शिंदे, अजित पवारही उपस्थित होते. रायगडावरील पुण्यतिथी कार्यक्रमाला शाहांची उपस्थिती होती. यावेळी अमित शाह यांनी जनतेला संबोधित केले.
मी शिवचरित्र वाचलंय. जिजाऊंनी छत्रपतींना स्वराज्याची प्रेरणा दिली. भूमीला स्वतंत्र करण्याचा विचार जिजाऊंनी दिला, बाल शिवाजींना छत्रपती बनण्याची प्रेरणा जिजाऊंनी दिली. म्हणून मी प्रथम जिजाऊंना वंदन करतो. स्वधर्म, स्वभाषेसाठी प्राण पणाला लावणारे अपराजित सैन्य या भूमीला लाभल्याचे अमित शाह म्हणाले.
चारही बाजून आदिलशाही, मुघलशाहीने घेरलेला महाराष्ट्र हिंदवी स्वराज्यामध्ये बदलला. अटकपासून कटकपर्यंत हिंदवी साम्राज्य पसरल. हळुहळू स्वधर्माची भाषा लोकांना कळू लागली. एक 12 वर्षाचा मुलगा भगवा पसरवण्याची शपथ घेतो. एका मुलाने संपूर्ण देशाला स्वराज्याचा मंत्र दिला. छत्रपतींची सेना कटक, कर्नाटकपर्यंत पोहोचली तेव्हा लोकांना विश्वास वाटला की हा देश, धर्म वाचला. स्वातंत्र्याला 100 वर्षे होतील तेव्हा भारत विकसित झालेला असेल, याची मूळ कल्पना शिवरायांनी रचल्याचेही ते यावेळी म्हणाले.
शिवचरित्र भारतातील मुलांपर्यंत पोहोचवायला हवं. शिवरायांना महाराष्ट्रापर्यंत सिमीत ठेवून नका. देशासह जगभरात शिवराय पोहोचवायला हवे, स्वभाषा, स्वधर्म, स्वराष्ट्राचे रक्षण त्यांनी केले. गुलामिकतेची मानसिकता त्यांनी तोडली. मी भाषण करायला नाही आलो तर शिवरायांकडून प्रेरणा घेण्यासाठी आलोय, असेही अमित शाह म्हणाले.
तिघांची औपचारिक एकञित बैठक नाही
उपमुख्यमंञी एकनाथ शिंदे राञी साडेबारा वाजता रिट्झ हॉटेलवर मुक्कामी पोहोचल्याने राञी तरी त्यांची अमित शाहांसोबत बैठक अशी झालीच नाही.सकाळी देखील या तिघांची औपचारिक एकञित बैठक अशी झालीच नाही कारण अमित शाहांना भेटायला भाजपचे स्थानिक नेते येत होते.अजित दादा देखील थेट एअरपोर्टवरच त्यांच्या स्वागताला हजर होते ते हॉटेलवर आले देखील नाहीत. सकाळी 10 वाजून 10 मिनिटांनी वाजता अमित शाह यांचा ताफा पुणे विमानतळाकडे गेला त्यावेळी माञ अमित शाह, सीएम देवेंद्र फडणवीस आणि डीसीएम एकनाथ एकाच गाडीत बसून एअरपोर्ट ला गेले.पुढे ते सर्वजन एकाच विमानात बसून रायगडला पोहोचले.
पालकमंत्रीपदावर तोडगा नाही
केंद्रीय गृहमंत्री अमित शाह आज रायगड दौ-यावर आहेत… या दौऱ्यावेळी राष्ट्रवादी काँग्रेसचे खासदार सुनील तटकरे यांनी शाह यांना जेवणासाठी आमंत्रित केलंय. हे आमंत्रण त्यांनी स्वीकारले असून ते दुपारी दोनच्या सुमारास तटकरे यांच्या रोह्यातील निवासस्थानी स्नेहभोजन करणार आहेत. या स्नेहभोजनात शाहंसाठी तटकरे फक्कड कोकणी बेत आखणार आहेत. शिवाय सध्या हापूस आंब्याचा सिझन असल्याने आमरस आणि आंब्याचे इतर पदार्थही असणार आहेत. रायगडच्या पालकमंत्रिपदावर शिवसेना आणि राष्ट्रवादीचाही दावा असल्याने मुख्यमंत्री देवेंद्र फडणवीस यांनी पालकमंत्री नियुक्तीला स्थगिती दिलीय. मात्र यावर अजून तोडगा निघालेला नाही. त्याचवेळी अमित शाह रायगड दौऱ्यात पालकमंत्रीपदाचा प्रश्न सुटण्याची शक्यता आहे. तटकरेंच्या रोह्यातील निवास्थानाचे भोजन यासाठी महत्वाचे मानले जातंय.. मात्र यामुळे शिवसेनेत अस्वस्थता असल्याची चर्चा आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
