सोशल मिडियाच्या वापर करुन शेअर बाजारात गुंतवणूक करण्याच्या आमिषाने पाषाण परिसरातील एका व्यवासायिकाची सायबर चोरट्यांनी एक कोटी ११ लाख ८० हजार रुपयांची आर्थिक फसवणूक केल्याचा प्रकार उघडकीस आला आहे.
.
याबाबत व्यावसायिकाने बाणेर पोलिस ठाण्यात अनोळखी आरोपींविरोधात तक्रार दाखल केली आहे. या तक्रारीनुसार अज्ञात सायबर चोरट्यांविरुद्ध फसवणुकीचा गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार व्यावसायिक पाषाण भागात राहण्यास आहेत. सायबर चोरट्यांनी त्यांना मे महिन्यात त्यांच्या मोबाइलवर एक मेसेज पाठविला होता. शेअर बाजारातील गुंतवणूक विषयक काम करणाऱ्या संस्थेतील प्रतिनिधी असल्याची बतावणी चोरट्यांनी केली होती. शेअर बाजारात गुंतवणूक केल्यास अल्पावधीत चांगल्याप्रकारे परतावा मिळेल, असे आमिष चोरट्यांनी व्यावसायिकाला दाखवले.
व्यावसायिकाला समाज माध्यमातील एका व्हाटॅसअप समूहात सहभागी करून घेतले. गुंतवणूक विषयक योजनांची माहिती त्यांना देण्यात आली. त्यानंतर एक लिंक देखील देण्यात आली. त्यानुसार व्यावसायिकाने सुरुवातीला काही रक्कम गुंतवणूक केली. चोरट्यांच्या खात्यात ऑनलाइन पद्धतीने पैसे जमा केल्यानंतर चोरट्यांनी त्यांना परतावा दिल्याचे भासविले. प्रत्यक्षात चोरट्यांनी त्यांच्या खात्यात परताव्यापोटी दिली जाणारी रक्कम जमा केली नव्हती. परतावा मिळाल्याने व्यावसायिकाने आणखी मोठी रक्कम गुंतविली. मागील चार महिन्यात सायबर चोरट्यांच्या खात्यात त्यांनी वेळोवेळी एक कोटी ११ लाख ८० हजार रुपये जमा केले. पैसे जमा केल्यानंतर चोरट्यांनी त्यांना परतावा दिला नाही. पैसे परत करण्याबाबत त्यांनी चोरट्यांच्या मोबाइल क्रमांकावर संपर्क साधला. फसवणूक झाल्याचे लक्षात आल्यानंतर त्यांनी सायबर पोलिस ठाण्यात याबाबत तक्रार दिली. पोलिस निरीक्षक एस देवकाते पुढील तपास करत आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
