संतोष देशमुख हत्या प्रकरणात मोठी अपडेट: आरोपी सुदर्शन घुले याच्या मोबाईल मधील डाटा रिकव्हर; धनंजय देशमुख यांची माहिती – Beed News

.

सरपंच संतोष देशमुख यांचे बंधू धनंजय देशमुख यांनी सीआयडी अधिकारी अनिल गुजर यांची भेट घेतली. यादरम्यान धनंजय देशमुख यांनी संतोष देशमुख हत्या प्रकरणासंदर्भातील तपासाची संपूर्ण माहिती घेतली. या तपासा मध्ये अडचण ठरणाऱ्या गोष्टींबाबत मुख्यमंत्री देवेंद्र फडणवीस यांनी ठोस भूमिका घ्यावी, अशी मागणी देखील धनंजय देशमुख यांनी केली आहे. मुख्यमंत्री देवेंद्र फडणवीस यांनी देशमुख कुटुंबाला न्याय मिळवून देण्यासाठी प्रयत्न करावा, अशी मागणी देखील त्यांनी केली. मात्र सध्या तपास समाधानकारक सुरू असल्याचे मत यावेळी धनंजय देशमुख यांनी व्यक्त केले.

संतोष देशमुख हत्या प्रकरणात मंत्री धनंजय मुंडे यांच्या राजीनाम्याची मागणी वारंवार केली जात आहे. यासंदर्भात तपासाची माहिती घेण्यासाठी धनंजय देशमुख यांनी केज येथील शासकीय विश्रामगृहात सीआयडीचे अधिकारी अनिल गुजर यांची भेट घेतली. तपासाच्या अनुषंगाने या दोघांमध्ये चर्चा झाली. यानंतर माध्यमांशी बोलताना धनंजय देशमुख यांनी धनंजय मुंडे यांच्या राजीनाम्यावर देखील आपली प्रतिक्रिया व्यक्त केली आहे. संतोष देशमुख यांना न्याय देताना ज्या गोष्टी अडचण ठरत असतील त्यावर मुख्यमंत्री देवेंद्र फडणवीस यांनी ठोस भूमिका घ्यावी, अशी आमची विनंती असल्याचे धनंजय देशमुख यांनी म्हटले आहे. मात्र धनंजय मुंडे यांच्या राजीनाम्यावर त्यांनी थेट भाष्य करणे टाळले आहे.

उज्वल निकम यांची नियुक्ती करणार

दरम्यान संतोष देशमुख यांचे बंधू धनंजय देशमुख आणि मस्साजोग येथील ग्रामस्थांनी भाजप आमदार सुरेश धस यांची देखील भेट घेतली. या भेटीदरम्यान आतापर्यंत झालेल्या तपासा संदर्भात चर्चा करण्यात आली. या तपासात कोणतीही कसर राहू नये, कोणताही आरोपी सुटता कामा नये, यासाठी ठोस उपाययोजना करण्याची चर्चा यावेळी झाली. त्यासाठीच या प्रकरणात सरकारी वकील म्हणून उज्वल निकम यांची नियुक्ती करणार असल्याची माहिती सुरेश धस यांनी दिली आहे.