समृद्धी महामार्गावर नांदगाव खंडेश्वरकडून नागपूरकडे टोमॅटो घेऊन जाणाऱ्या ट्रकला अचानक आग लागली. चॅनल नंबर १०६ नजीक घडलेल्या या घटनेत ट्रक पूर्णपणे जळून खाक झाला. आगीची कल्पना येताच चालक आणि वाहकाने ट्रकमधून उडी मारून स्वतःचे प्राण वाचवले.
.
या अपघातात ट्रकमधील सर्व टोमॅटो जळून नष्ट झाले, काही टोमॅटो रस्त्यावर विखुरले होते. प्राथमिक अंदाजानुसार, ट्रकमधील इलेक्ट्रिकल सर्किटमधील बिघाडामुळे ही आग लागली असावी असे सांगण्यात येत आहे.
घटनेची माहिती मिळताच समृद्धी महामार्गावरील कर्मचाऱ्यांनी तात्काळ अग्निशमन दलाशी संपर्क साधला. धामणगाव नगरपरिषदेचे अग्निशमन वाहन आणि कर्मचारी घटनास्थळी दाखल झाले आणि त्यांनी आगीवर नियंत्रण मिळवण्याचे प्रयत्न केले. सुदैवाने या घटनेत कोणतीही जीवितहानी झाली नाही.
दरम्यान, अपघाताच्या घटनास्थळावरून दत्तापूर आणि तळेगाव दशासर या दोन पोलीस ठाण्यांच्या कर्मचाऱ्यांमध्ये हद्दीचा वाद सुरू होता. सुरुवातीला घटनास्थळ दत्तापूर पोलिसांच्या हद्दीत असल्याचे सांगण्यात आले. मात्र, दत्तापूर पोलिसांशी संपर्क साधला असता, तळेगाव पोलीस घटनास्थळी पोहोचले असून, सायंकाळी ७ च्या सुमारास दत्तापूर पोलिसांचे पथकही रवाना करण्यात आल्याची माहिती मिळाली. वृत्त लिहिपर्यंत घटनेची नोंद कोणी आणि केव्हा घेणार हे निश्चित झाले नव्हते.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
