राज्याची राजधानी असलेल्या मुंबईतील चेंबूर परिसरात एक भयंकर घटना घडली आहे. चेंबूरच्या सुभाष नगर भागातील एका निर्माणाधीन इमारतीच्या 6 व्या मजल्यावरून 6 कामगार कोसळलेत. या घटनेत एका कामगाराचा मृ्त्यू झाला असून, 5 जण जबर जखमी झालेत. या घटनेमुळे परिसरात एकच खळबळ माजली आहे. यासंबंधीच्या माहितीनुसार, सुभाष नगर येथील एका आलिशान इमारतीचे वेगात बांधकाम सुरू आहे. शनिवारी दुपारी 12.05 च्या सुमारास या ठिकाणी कामगार नेहमीप्रमाणे काम करत होते. ते इमारतीच्या 6 व्या मजल्यावर बांधकाम करत होते. यावेळी 6 कामगार अचानक तोल जावून 80 ते 90 फूट उंचीवरून खाली कोसळले. या घटनेत 6 कामगार जबर जखमी झाले. त्यातील एका कामगाराचा जागीच मृत्यू झाला. या घटनेची माहिती मिळताच बांधकामस्थळी असणारे इतर कामगार व स्थानिक नागरिकांनी घटनास्थळी धाव घेऊन मदतकार्य सुरू केले. रक्ताच्या थारोळ्यात पडलेल्या सर्वच कामगारांना त्यांनी तातडने घाटकोपर येथील राजावाडी रुग्णालयात दाखल केले. त्यांच्यावर उपचार करणाऱ्या डॉक्टरांनी 5 पैकी काही कामगारांची प्रकृती चिंताजनक असल्यामुळे त्यांच्यावर अतिदक्षता विभागात उपचार सुरू असल्याचे सांगितले. पोलिसांनी घटनास्थळावरील पंचनामा केला आहे. सुरक्षा नियमांकडे साफ दुर्लक्ष या प्रकरणी सर्वात गंभीर गोष्ट म्हणजे सदर कामगार एवढ्या उंचीवर काम करत असतानाही त्यांनी सेफ्टी किट वापरले नव्हते. नियमानुसार, उंच इमारतीवर काम करत असताना हेल्मेट, सेफ्टी बेल्ट व नेट असणे अनिवार्य आहे. पण या ठिकाणी सुरक्षेच्या नियमांचे साफ उल्लंघन झाल्याचे प्राथमिक तपासात निदर्शनास आले. या कामगारांनी सेफ्टी बेल्ट लावले अकसते तर कदाचित ही दुर्घटना घडली नसती अशी चर्चा घटनास्थळी सुरू आहे. काय आहेत जखमी कामगारांची नावे? राजावाडी रुग्णालयात रामाल्लू नामक 55 वर्षीय कामगाराला डॉक्टरांनी मृत घोषित केले. उर्वरित 5 कामगारांवर सध्या उपचार सुरू आहेत. 22 वर्षीय कामगार गुनाधर राय हा गंभीर जखमी आहे. त्याच्यावर आयसीयूमध्ये उपचार सुरू आहेत. याशिवाय उसराई (30), रमेश राय (25), विजय (35) व संदीप (27) अशी इतर जखमींची नावे आहेत. या घटनेमुळे परिसरात एकच खळबळ उडाली असून, कामगारांच्या सुरक्षिततेवरती पुन्हा एकदा प्रश्न चिन्ह निर्माण झालं आहे. आज सकाळीच आणखी एक दुर्घटना दुसरीकडे, मुंबईतील वरळी – शिवडी उन्नत मार्गाच्या कामात लोखंडी रॉड कोसळून अशीच एक घटना घडली आहे. विकसाकामांवेळी झालेली या महिन्यातील ही मुंबईमधील दुसरी दुर्घटना आहे. हा लोखंडी रॉड एका व्यक्तीवर कोसळला आहे. यामुळे तो गंभीर जखमी झाला आहे. केईएम रुग्णालय परिसरात ही दुर्घटना घडली आहे. सध्या जखमी व्यक्तीवर रुग्णालयात उपचार सुरू आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
