Nilam Gore On Ladki Bahin: विधानसभा निवडणुकीआधी राज्यात लाडकी बहीण योजना सुरु करण्यात आलीय. याअंतर्गत महिलांच्या खात्यात दरमहा 1500 रुपये देण्यात आले. दरम्यान विधानसभा निवडणुकीत महायुती सरकार आल्यास ही रक्कम 2100 रुपये करणार असल्याचे आश्वासन देण्यात आले होते. पण सध्या तरी 2100 रुपयांची रक्कम महिलांच्या खात्यात येणं अशक्यच दिसतंय. लाडकी बहीण योजना बाद होईल असं विधान मनसे अध्यक्ष राज ठाकरेंनी गुढीपाडवा मेळाव्यात केलं होतं. महायुतीतल्या महत्वाच्या नेत्यांकडूनच यासंदर्भात विधान केलं जातंय. उपमुख्यमंत्री अजित पवार यांनी 2100 रुपये सध्या देणं शक्य नसल्याचं म्हटलंय. यात आता शिवसेना नेत्या निलम गोरे यांचे विधान चर्चेत आलंय.
काय म्हणाल्या नीलम गोऱ्हे?
लाडकी बहीण योजनेचे पैसे देण्यावरून उपसभापती नीलम गोऱ्हे यांनी मोठं वक्तव्य केलंय. राज्य सरकारला आता लाडक्या बहिणींना 2 हजार 100 रुपये देणे शक्य नसल्याचं त्यांनी म्हटलंय. जेव्हा सरकारला शक्य होईल तेव्हा सरकार लाडक्या बहिणींना दीड हजारावरून 2 हजार 100 रुपये देईल. असंही त्या म्हणाल्या.
राज ठाकरेंचं भाकीत आणि सत्ताधाऱ्यांची टीका
मुख्यमंत्री माझी लाडकी बहीण योजनेअंतर्गत राज्यातील आर्थिकदृष्ट्या दुर्बल महिलांना दरमहा 1500 रुपये देण्यात येतात. आता एप्रिल महिन्याच्या हप्ता कधी मिळणार? याबाबत महिलांना उत्सुकता लागली आहे. अशातच लाडकी बहीण योजना बंद होणार, असे भाकित महाराष्ट्र नवनिर्माण सेनेचे अध्यक्ष राज ठाकरे यांनी केलं आहे. लाडकी बहीण योजनेमुळे सरकारवर मोठा आर्थिक बोजा पडतोय.लाडक्या बहिणांना 2100 रुपये निधी केल्यास सरकारवर वर्षाला 63 हजार कोटींचा बोजा पडणार असल्याचंही राज ठाकरे म्हणालेत. राज ठाकरेंच्या या भाकितावर सत्ताधा-यांनी टीका केलीये.योजनेमुळे सरकारवर ताण येतोय, हे खरंय पण लाडक्या बहिणींना आम्ही वा-यावर सोडणार नाही.उत्पन्न वाढण्यावर आमचा भर आहे असं शंभुराज देसाई, प्रवीण दरेकर यांनी म्हटलंय.’लाडक्या बहिणींना वा-यावर सोडणार नाही. 2 वर्षांत आर्थिक स्थिती भक्कम होईल, असं सत्ताधाऱ्यांकडून सांगण्यात येतंय.लाडकी बहिण योजना, कर्जमाफी आणि इतर योजनांच्या घोषणांमुळे महायुती सरकार सत्तेत आलं.मात्र सत्तेत आल्यानंतर या योजना सुरू ठेवणं, सरकारला आता जड जातंय…महिलांना एकीकडे 2100 रुपयांची आस आहे, मात्र 1500 देणंच सरकारला मुश्किल झालंय.आता राज ठाकरेंनी योजना बंद होईल असं म्हंटलय. त्यांचं हे भाकीत आता कितपत खरं होईल हे येणाऱ्या काळातच कळेल.
अजित पवारांनी काय सांगितलं?
‘मुख्यमंत्री माझी लाडकी बहीण’ योजनेंतर्गत सुमारे 2 कोटी 53 लाख लाभार्थी महिलांना जुलै, 2024 पासून आर्थिक लाभ देण्यात येत आहे. त्यासाठी आतापर्यंत 33 हजार 232 कोटी रुपये खर्च झाला आहे. 2025-26 मध्ये या योजनेकरीता एकूण 36 हजार कोटी रुपये नियतव्यय प्रस्तावित आहे,’ अशी माहिती अजित पवारांन दिली. यावेळी एका आमदाराने त्यांना मधेच रोखून 2100 रुपये झाले ना? अशी विचारणा केली. त्यावर अजित पवारांनी जरा बजेट होऊ द्या सांगत दम ठेवा असा सल्ला दिला.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
