Pune Crime: भाजपचे विधान परिषदेचे आमदार अमित गोरखे यांचे स्वीय सहाय्यक सुशांत भिसे यांच्या पत्नीचा मृत्यू झाला. पैशाअभावी उपचार न केल्याने तिचा मृत्यू झाल्याचा गंभीर आरोप दिनानाथ मंगेशकर रुग्णालयावर करण्यात येतोय. या घटनेनंतर पुण्यासह राज्यात खळबळ उडाली आहे. मंगेशकर रुग्णालय प्रशासनावर चहुबाजूने टिका केली जातेय. आरोपीच्या पिंजऱ्यात उभे केल्याने रुग्णालय प्रशासनाच्या विरोधात संताप व्यक्त केला जातोय. दीनानाथ मंगेशकर रुग्णालयाकडून बाजू सावरून घेण्याचा प्रयत्न करण्यात आलाय. रुग्णालयाने काय केलाय खुलासा? जाणून घेऊया.
काय आहे खुलासा?
डॉक्टर केळकर यांचे ऑपरेशन संपले आणि त्यांनी डॉक्टर घैसास यांना फोन केला. संबंधित रुग्ण न सांगताच निघून गेल्याचे त्यांनी कळवले. रुग्णाचे नातेवाईक पैशाची तजबीज करतायत, असे डॉक्टर घैसास यांना वाटत होते. तशी तजबीज न झाल्यास रुग्णाच्या पतीला ससून येथे जाण्याचा सल्ला दिला होता. रुग्णाची गुंतागुंतीची शस्त्रक्रिया आणि होणाऱ्या अपुऱ्या वाढीच्या गर्भाची सुश्रुषा ससून येथील एन आय सी मध्ये व्यवस्थित होईल, यासाठी हा सल्ला देण्यात आल्याचे त्यांनी सांगितले.
प्रशासनाला नव्हती कल्पना
दरम्यानच्या काळात एका नर्सने ते आपली बॅग उचलून चालत गेल्याचे सांगितले. थोड्या वेळाने रुग्णाच्या नातेवाईकांकडून काहीच हालचाल न झाल्याने घैसास यांनी रुग्णाच्या पतीला फोन केला. पण त्यांनी फोन उचलला नाही. त्यामुळे 28 मार्चच्या दुपारनंतर रुग्णाचे काय झाले? याबद्दल डॉक्टर घैसास आणि रुग्णालय प्रशासन यांना काहीच कल्पना नव्हती, असे स्पष्टीकरण देण्यात आले.
समितीने काढला निष्कर्ष
रुग्णाचा सिजरियनमध्ये झालेल्या गुंतागुंतीमुळे मृत्यू झाल्याचे आम्हाला प्रसारमाध्यमातून कळाले. चौकशी अंती आणि रुग्णालयातील इतर सीनियर गायकोलॉजिस्टच्या सल्ल्यानुसार समितीने निष्कर्ष काढला आहे.
‘ॲडव्हान्स मागितल्याच्या राग’
रुग्णासाठी ट्वीन प्रेग्नेंसी धोकादायक होती. माहितीचें रुग्णालय असून सुद्धा ANC चेकअपसाठी रुग्ण पहिले 6 महिने रुग्णालयात आल्या नाहीत. ॲडव्हान्स मागितल्याच्या रागातून सदर तक्रार केलेली दिसते, असे यात म्हटलंय.
‘वैद्यकीय सल्ले मानले नाहीत’
रुग्णालयाचे वैद्यकीय सल्ले मानले नाहीत तसेच वैद्यकीय संचालकांनी जमेल तेवढे पैसे भरून ॲडमिट होण्याचा सल्ला दिला पण त्यांनी तो पाळला नसल्याचा निष्कर्ष रुग्णालयाच्या समितीने काढला. रुग्णाच्या मृत्यूमुळे आलेली निराशा आणि ॲडव्हान्स पैसे मागितल्यामुळे रागातून ही दिशाभूल करणारी तक्रार करण्यात आली आहे असे रुग्णालय समितीचे म्हणणे आहे.
नेमकं काय घडलं?
सुशांत भिसे यांच्या पत्नी तनिषा भिसे यांना 29 मार्च रोजी रुग्णालयात उपचारासाठी आणण्यात आलं होतं. तनिषा या सात महिन्यांच्या गर्भवती होत्या आणि त्यांना रक्तस्त्राव होत होता. हॉस्पिटलमध्ये त्यांना उपचारासाठी नेल्यानंतर तेथील डॉक्टरांनी भिसे कुटुंबियांकडून 20 लाख रुपये खर्च येणार असल्याची माहिती दिली. दहा लाख रुपये भरले तरच उपचार केला जाईल असं थेट रुग्णालयाकडूनच सांगण्यात आलं. ज्यावर कुटुंबीयांनी अडीच लाख रुपये भरतो, असं सांगितलं. मात्र रुग्णालयात उपस्थित डॉक्टरांनी ते मान्य न केल्यानं नाईलाजास्तव भिसे कुटुंबीयांना तनिषा यांना दुसऱ्या रुग्णालयात घेऊन जावं लागलं. यादरम्यान त्यांचा रक्तस्त्राव वाढला. वाकडच्या रुग्णालयात त्यांनी दोन मुलींना जन्म दिला मात्र प्रचंड रक्तस्त्राव झाल्याने त्यांचा दुर्दैवी अंत झाला. पुण्यातल्या रुग्णालयात वेळीच उपचार मिळाले असते तर त्यांचा जीव वाचला असता असं गोरखे यांनी म्हटलं आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
