मे महिना सुरुय की जून? मान्सूनपूर्व पावसाचा मारा आणखी वाढणार, सतर्क राहा!

Weather News : केंद्रीय हवामानशास्त्र विभागाच्या माहितीनुसार पुढील काही दिवसांमध्ये कर्नाटक, गोवा आणि कोकणातील किनारपट्टी भागांमघ्ये पावसाचा जोर वाढणार असून, ही स्थिती पुढील काही तासांसाठी कायम राहील असा अंदाज हवामानविभागानं वर्तवला आहे. कर्नाटकच्या उत्तरेला गोव्याच्या किनारपट्टी भागांमध्ये असणाऱ्या अरबी समुद्राच्या क्षेत्रामध्ये कमी दाबाचा पट्टा तयार होत असून, आणखी एका पश्चिमी झंझावातामुळं हवामान स्थितीमध्ये बदल होण्याची शक्यता आहे. परिणामी पुढील पाच ते सहा दिवसांमध्ये गुजरात, कोकण, कर्नाटक, गोवा आणि केरळमध्ये पावसाचं प्रमाण तुलनेनं जास्त असेल असा प्राथमिक अंदाज वर्तवण्यात आला आहे. 

सागरी वाऱ्यांच्या प्रभावामुळे गुरुवारी कमी दाब क्षेत्र अधिक तीव्र होणार असून, त्यानंतर हे वारे उत्तरेकडे रवाना होतील. मात्र त्यांची  तीव्रता इथं वाढलेली असेल. परिणामस्वरुप कोकण, घाटमाथ्यावर पुढच्या 48 तासांमध्ये मुसळधार पावसाचा इशारा हवामान विभागाने जारी केला आहे. दरम्यान, मुंबईसह राज्याच्या काही भागात पडणारा हा वळिवाचा पाऊस आहे याची नोंद घ्यावी असं सांगताना तो मान्सून नाही असंही हवामान विभागानं स्पष्ट केलं आहे. 

राज्यात पावसाचा इशारा कायम… 

पुढील 24 तासांमध्ये महाराष्ट्राच्या अनेक जिल्हांमध्ये पावसाचा अलर्ट जारी करण्यात आला आहे. कोकण आणि पश्चिम महाराष्ट्रातील काही जिल्ह्यात पावसाचा अलर्ट जारी करण्यात असून, रायगड रत्नागिरी सिंधुदुर्ग पुणे सातारा कोल्हापूर इथं ऑरेंज अलर्ट आणि पालघर, ठाणे, मुंबई, धुळे, नंदुरबार, जळगाव, नाशिक, अहिल्यानगर, सातारा, सोलापूर, संभाजीनगर, जालना, बीड, लातूर, धाराशिव, अकोला, अमरावती, बुलढाणा, नागपूर, वाशिम, यवतमाळ इथं पावसाचा यलो अलर्ट जारी करण्यात आला आहे. 

हेसुद्धा वाचा : ठरलेल्या मुहूर्ताआधीच Monsoon केरळात धडकणार; महाराष्ट्रातही यंदा मोठा मुक्काम? कुठवर पोहोचले मोसमी वारे?

मान्सूनपूर्व पाऊस आणि समुद्रात तयार होणारी चक्राकार वाऱ्यांची स्थिती पाहता समुद्र खवळलेला असल्यामुळं खोल समुद्रात न जाण्याचा इशारा कोकणासह मुंबई किनारपट्टीवरील मासेमारांनाही देण्यात आला आहे. सिंधुदुर्गात मान्सूनपूर्व पावसामुळे 25 मे पर्यंत मच्छीमारी बंद राहील असा इशारा देण्यात आला आहे.