जिल्हा परिषदेकडून महिला शेतकऱ्यांना मान: कृषी विभागामार्फत कृषिदिनी 14 कर्तबगार महिलांचा शाल-श्रीफळाने सत्कार – Amravati News

.

जिल्हा परिषदेच्या डॉ. पंजाबराव देशमुख सभागृहात आयोजित एका कार्यक्रमात हा सत्कार सोहळा घेण्यात आला. यावेळी जिल्हा परिषदेच्या अतिरिक्त मुख्य कार्यकारी अधिकारी तथा डीआरडीएच्या प्रकल्प संचालक प्रिती देशमुख, उपमुख्य कार्यकारी अधिकारी बाळासाहेब बायस, जिल्हा अधीक्षक कृषी अधिकारी डॉ. राहुल सातपुते, ‘आत्मा’ च्या प्रकल्प संचालक अर्चना निस्ताने, कृषी विकास अधिकारी मल्ला तोडकर, कृषी विभागाचे वरूण देशमुख, अजय तळेगावकर, निलेश राठोड, प्रवीण खर्चे, उपस्थित होते. तर प्रमुख मार्गदर्शक म्हणून विभागीय कृषी सहसंचालक प्रमोद लहाळे यांना निमंत्रित करण्यात आले होते.

हरित क्रांतीचे प्रणेते, माजी मुख्यमंत्री वसंतराव नाईक यांचा जन्मदिन हा दरवर्षी महाराष्ट्रात कृषी दिन म्हणून साजरा केला जातो. याच दिनाचे औचित्य साधून जिल्हा परिषद व राज्य शासनाचा कृषी विभाग यांच्या संयुक्त विद्यमाने हा सत्कार करण्यात आला. सर्व महिला शेतकऱ्यांचा शाल, श्रीफळ, कृषी दैनंदिनी व सन्मानचिन्ह देऊन सत्कार करण्यात आला. यामध्ये जिल्ह्यातील सर्व तालुक्यातील महिला शेतकरी उपस्थित होत्या. अध्यक्षीय भाषणामध्ये सीइओ संजीता महापात्र यांनी जिल्ह्यातील सर्व महिलांचा सत्कार करताना मला विशेष आनंद होत असल्याबाबतचे मत व्यक्त केले. पुरुषप्रधान संस्कृतीमध्येही महिला कायमस्वरूपी त्यांच्या पाठिशी होत्या. परंतु त्यांना विशेष ओळख दिली जात नव्हती. आज त्या करत असलेल्या उल्लेखनीय कामगिरीबद्दल त्यांना विशेष ओळख दिली जात असल्याबाबत त्यांनी आनंदही व्यक्त केला.

विभागीय कृषी सहसंचालक प्रमोद लहाळे यांनी वसंतरावजी नाईक यांच्या जीवन चरित्रावर प्रकाश टाकत त्यांनी केलेल्या उल्लेखनीय कामगिरीचे महत्त्व उपस्थितांना पटवून दिले. प्रास्ताविक जिल्हा परिषदेचे कृषी विकास अधिकारी मल्ला तोडकर यांनी केले. प्रस्ताविकामध्ये जिल्ह्यातील महिलांचा सत्कार करणे हा आमच्यासाठी अत्यंत आनंदाचा क्षण असल्याबाबतचे मत त्यांनी व्यक्त केले. संचालन कृषी अधिकारी पवनकुमार ढोमणे यांनी केले. आभार जिल्हा कृषी अधिकारी निलेश राठोड यांनी मानले. यावेळी कृषी विभागाचे सर्व अधिकारी, कर्मचारी उपस्थित होते.