हिंगोली तालुक्यातील पिंपळखुटा तलावाच्या बेकायदेशीर ब्लास्टींग करून २२ घरांचे एक लाख रुपयांचे नुकसान केल्याच्या आरोपावरून दोघांवर हिंगोली ग्रामीण पोलिस ठाण्यात रविवारी ता. १३ गुन्हा दाखल झाला आहे.
.
हिंगोली तालुक्यात पिंपळखुटा तलावासाठी भोगाव, पिंपळखुटा शेत शिवारातील जमीनी संपादीत करण्यात आल्या आहेत. या तलावामुळे सुमारे १५०० हेक्टर क्षेत्र सिंचनाखाली येणार आहे. लघु पाटबंधारे विभागामार्फत या तलावाचे काम केले जाणार असून त्यासाठी निवीदा काढण्यात आल्या होत्या. त्यानुसार निवीदा काढून पुणे येथील कंत्राटदाराला काम मिळाले आहे. या तलावाच्या कामाला सुरवात करण्यात आली आहे.
दरम्यान, तलावाचे काम करीत असतांना पिंपळखुटा गावाजवळच ता. १६ मे रोजी रात्री साडेसात वाजण्याच्या सुमारास ब्लास्टींग करण्यात आली. यामुळे परिसरातील २२ घरांच्या भिंतींना तडे गेले होते. या प्रकरणी गावकऱ्यांनी प्रशासनाकडे तक्रारी केल्यानंतर जिल्हाधिकारी राहुल गुप्ता यांनी तातडीने चौकशी करून अहवाल सादर करण्याचे आदेश दिले होते. त्यानुसार उपविभागीय अधिकारी समाधान घुटुकडे, तहसीलदार श्रीकांत भुजबळ यांच्या पथकाने पाहणी केली होती. त्यानंतर या प्रकरणाचा सविस्तर अहवाल जिल्हा प्रशासनाकडे सादर केला होता. या अहवालानंतर कंत्राटदाराने बेकायदेशीररित्या ब्लास्टींग केल्याचे स्पष्ट झाले होते. त्यावरून या प्रकरणी गुन्हा दाखल करण्याचे आदेश जिल्हाधिकारी गुप्ता यांनी दिले होते.
त्यानुसार आज ग्राम महसुल अधिकारी विनोद गादेकर यांनी हिंगोली ग्रामीण पोलिस ठाण्यात तक्रार दाखल केली. यामध्ये पिंपळखुटा साठवण तलावात बेकायदेशीर ब्लास्टींग करून २२ घरांचे सुमारे १ लाख रुपयांचे नुकसान केल्याचे तक्रारीत नमुद केले. यावरून हिंगोली ग्रामीण पोलिसांनी केशव हेडगे (रा. वरकुटे खुर्द, जि. पुणे), ट्रॅक्टर चालक लक्ष्मण खंदारे (रा. पिंपळखुटा) यांच्या विरुध्द विस्फोटक अधिनियमांतर्गत गुन्हा दाखल केला आहे. पोलिस निरीक्षक शामराव डोंगरे, जमादार बाळासाहेब खोडवे, आकाश पंडीतकर पुढील तपास करीत आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
