Pune Rave Party: पुण्यातील खराडी परिसरातून एक धक्कादायक आणि खळबळजनक बातमी समोर येत आहे. येथील परिसरात हायप्रोफाइल रेव्ह पार्टीवर पुणे पोलिसांच्या गुन्हे शाखेने छापेमारी करून मोठी कारवाई केली आहे. ही रेव्ह पार्टी खराडीतील एका उच्चभ्रू निवासी भागातील फ्लॅटमध्ये ‘हाउस पार्टी’च्या नावाखाली आयोजित करण्यात आली होती, अशी माहिती समोर येत आहे. या कारवाईत पोलिसांनी मोठ्या प्रमाणात अमली पदार्थ, दारू आणि हुक्का जप्त केले आहेत. रविवारी पहाटेच्या सुमारास ही कारवाई करण्यात आली. याबद्दल सविस्तर जाणून घेऊया.
कितीजण ताब्यात?
पुण्यातील खराडी परिसरातील एका फ्लॅटमध्ये ही रेव्ह पार्टी सुरू होती. हा परिसर उच्चभ्रू आणि आयटी हब म्हणून ओळखला जातो. पुणे पोलिसांच्या गुन्हे शाखेला याबद्दल गुप्त माहिती मिळाली होती. यानंतर पहाटे साडेपाचच्या सुमारास ही कारवाई करण्यात आली. पोलिसांनी फ्लॅटवर धाड टाकून तिथे उपस्थित असलेल्या संशयितांना ताब्यात घेतले. या रेव्ह पार्टीत सहभागी असलेल्या पाच जणांना पोलिसांनी ताब्यात घेतले, ज्यात तीन महिला आणि दोन पुरुषांचा समावेश आहे. यातील काही जण उच्चभ्रू वर्गातील असल्याची माहिती आहे. पुण्यातील रेव्ह पार्टीत एकनाथ खडसेंच्या जावयाचा समावेश होता, अशी माहिती समोर येतेय. प्रांजल खेवलकर असे त्यांचे नाव आहे.
कोणत्या कलमाखाली गुन्हा दाखल?
पोलिसांनी घटनास्थळावरून मोठ्या प्रमाणात अमली पदार्थ (प्रामुख्याने ड्रग्स), दारू आणि हुक्का जप्त केले. जप्त केलेल्या अमली पदार्थांचे प्रकार आणि प्रमाण याबाबत तपास सुरू आहे. संशयितांविरुद्ध एनडीपीएस कायदा (Narcotic Drugs and Psychotropic Substances Act) आणि संबंधित कलमांखाली गुन्हा दाखल करण्यात आला आहे. तसेच, अवैध दारू आणि हुक्का सेवनासंदर्भातही कारवाई सुरू आहे.
मुख्य सूत्रधार कोण?
पुणे पोलिस आयुक्त अमितेश कुमार यांच्या मार्गदर्शनाखाली शहरात अमली पदार्थ आणि अवैध धंद्यांविरुद्ध कठोर कारवाई सुरू आहे. या रेव्ह पार्टीच्या आयोजनामागील मुख्य सूत्रधार कोण होते, अमली पदार्थांचा पुरवठा कुठून झाला, आणि यामागे कोणते मोठे रॅकेट आहे का, याचा तपास पोलिस करत आहेत. संशयितांची चौकशी सुरू असून, त्यांच्याकडून अधिक माहिती मिळवण्याचा प्रयत्न केला जात आहे.
रेव्ह पार्ट्यांचे प्रमाण वाढले
खराडी हा पुण्यातील आयटी हब आणि उच्चभ्रू वस्तीचा परिसर आहे. गेल्या काही वर्षांत अशा रेव्ह पार्ट्यांचे प्रमाण वाढत असल्याचे पोलिसांनी नमूद केले आहे. यापूर्वीही पुणे पोलिसांनी अवैध धंदे, दारू आणि अमली पदार्थांविरुद्ध कारवाई केली आहे. अशा अवैध गोष्टींची माहिती तात्काळ पोलिसांना कळवावी, जेणेकरून अशा घटनांना आळा घालता येईल, असे आवाहन पोलिसांनी केलंय.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
