महादेव मुंडे हत्या प्रकरणात 4 आरोपींना अटक: आमदार रोहित पवार यांची माहिती, 2 वर्षे उशिराने पोलिसांना आज मुहूर्त मिळाल्याचा टोला – Beed News

.

परळी येथील व्यापारी तथा पिग्मी एजंट महादेव मुंडे यांची 21 ऑक्टोबर 2023 रोजी निर्घृण हत्या करण्यात आली होती. त्यांचा मृतदेह परळी तहसील कार्यालयासमोरील मैदानात आढळला होता. या प्रकरणी शहर पोलिस ठाण्यात गुन्हा दाखल करण्यात आला. पण अद्याप एकाही आरोपीला अटक करण्यात आली नव्हती. अखेर महादेव मुंडे यांच्या पत्नी ज्ञानेश्वरी मुंडे यांनी गुरूवारी या प्रकरणी मुख्यमंत्री महादेव मुंडे यांची भेट घेतली. त्यानंतर मुख्यमंत्र्यांनी या प्रकरणाच्या एसआयटी चौकशीचे आदेश दिले. त्यानंतर दुसऱ्याच दिवशी म्हणजे शुक्रवारी या प्रकरणी 4 आरोपींना अटक करण्यात आली. या प्रकरणी आरोपींची नावे कळली नाहीत. पण ही एक मोठी कारवाई असल्याचे मानले जात आहे.

उशिराने का होईना तपासाला मुहूर्त मिळाला

आमदार रोहित पवार यांनी एका ट्विटद्वारे या अटकसत्राची माहिती दिली. ते या प्रकरणी म्हणाले की, महादेव मुंडे हत्या प्रकरणात चार आरोपीना आज सकाळी अटक करण्यात आली असून दोन वर्षे उशिराने का होईना अखेर पोलिस तपासाला आज मुहूर्त मिळाला असेच म्हणावे लागेल.

मुख्यमंत्र्यांची भेट घेतल्यानंतर पोलिसांनी कारवाईला सुरवात केली यावरून राजकीय दबावामुळे पोलीस यंत्रणांचे हात बांधले गेले होते का ? मुख्यमंत्र्यांची भेट घेऊन नमस्कार केला तरच पोलिस कारवाईला सुरवात करतात का? ज्यांना न्याय हवाय अशा सर्वांनी मुख्यमंत्र्यांच्या भेटीसाठी वर्षा बंगल्यासमोर रांग लावायची का? असे प्रश्न आज निर्माण होतात. असे असेल तर राज्यातली बिघडलेली कायदा सुव्यवस्था बघता लांबच लांब रांगा लागतील.

असो, या महादेव मुंडे हत्या प्रकरणातील जो मुख्य आरोपी खुलेआम फिरत होता तो आता फरार असून त्याच्या देखील मुसक्या पोलीस लवकरच आवळतील ही अपेक्षा. एसआयटी तपासाच्या माध्यमातून मुंडे कुटुंबाला लवकर न्याय मिळावा व बीड जिल्हा दहशतमुक्त व्हावा यासाठी मुख्यमंत्री व पालकमंत्री यांनी ‘राजकीय मैत्री’ बाजूला सारून विशेष लक्ष पुरवावे ही विनंती, असे त्यांनी म्हटले आहे.

महादेव मुंडेंना न्याय मिळेल ही अपेक्षा – जितेंद्र आव्हाड

आमदार जितेंद्र आव्हाड यांनीही या कारवाईचे स्वागत केले. तसेच राजकीय इच्छाशक्तीचा अभाव व पोलिसांवर असणाऱ्या दबावामुळेच आतापर्यंत या प्रकरणी कारवाई झाली नसल्याचा आरोपही त्यांनी केला आहे. महादेव मुंडे हत्या प्रकरणात आज सकाळी 4 संशयितांना अटक करण्यात आली आहे, अशी माहिती समजते आहे. काल महादेव मुंडे यांच्या पत्नी मुख्यमंत्री देवेंद्र फडणवीसांना भेटल्या आणि आज लगेच आरोपींची धरपकड देखील करण्यात आली. याचाच अर्थ राजकीय इच्छाशक्तीचा अभाव आणि पोलिसांवर असणाऱ्या दबावामुळेच या प्रकरणात कारवाई करण्यात येत नव्हती. महादेव मुंडे यांना लवकरच न्याय मिळेल अशी आशा आता वाटत आहे, असे ते म्हणालेत.

महादेव मुंडे यांच्या हत्येचा घटनाक्रम