बोलेरो जीपला अज्ञात वाहनाची धडक: ​​​​​​​हिंगोलीची एक महिला ठार, आठ जखमी; ठाणे जिल्ह्यातील शहापूर येथील घटना – Hingoli News

.

याबाबत अधिक माहिती अशी की, मुंबई येथे मंगळवारी ता. १२ वारकरी परिषदेच्या एका पदाधिकाऱ्याच्या सत्काराचा कार्यक्रम मंत्रालयात आयोजित करण्यात आला होता. या सत्कार कार्यक्रमासाठी हिंगोली जिल्हयातील नऊ जण एका बोलोरो जीपने मुंबईकडे निघाले होते. सदर जीप समृध्दी महामार्गावरून जात असतांना मध्यरात्री साडेबारा ते एक वाजण्याच्या सुमारास शहापूर जवळ चालक मंगेश खोडके याने लघुशंका व पाणी पिण्यासाठी जीप थांबवली. त्यामुळे जीपमधील सर्व जण खाली उतरले होते.

दरम्यान, पाच मिनिटांत सर्व जण पुन्हा जीपमध्ये बसले. जीप सुरु होण्यापुर्वीच पाठीमागून भरधाव वेगाने येेणाऱ्या वाहनाने जीपला धडक दिली. या अपघातात जीपच्या पाठीमागचा भाग चेपल्या गेल्या. या अपघातात जीपमध्ये पाठीमागे बसलेल्या गोदावरीबाई मोतीराम गायकवाड (४५, रा. वडद, ता. हिंगोली) ह्या गंभीर जखमी झाल्या.

या शिवाय जीपमधील द्वारका डाखोरे, कुंताबाई असोले, पंचफुला गिरी, रामकिशन गायकवाड, अरविंद खोडके, चालक मंगेश खोडके, शरद देशमुख, रविंद्र वाघमारे हे जखमी झाले. या अपघाताची माहिती मिळाल्यानंतर महामार्गा पथकाचे कर्मचारी तसेच शहापूर पोलिस ठाण्याचे निरीक्षक मुकेश ढगे, उपनिरीक्षक सुरेश बावीस्कर, जमादार देविदास चव्हाण यांनी घटनास्थळी जाऊन पाहणी केली.

या अपघातात सर्व जखमींना उपचारासाठी शहापूरच्या उपजिल्हा रुग्णालयात दाखल करण्यात आले. मात्र गंभीर जखमी असलेल्या गोदावरीबाई यांचा मृत्यू झाल्याचे वैद्यकिय अधिकाऱ्यांनी जाहिर केले. तर इतर जखमींवर उपचार केले जात आहेत. या अपघातानंतर जीपला धडक देणाऱ्या वाहन चालकाने वाहनासह पळ काढल्याचे पोलिसांनी सांगितले. या प्रकरणी शहापूर पोलिस ठाण्यात अज्ञात वाहन चालकावर गुन्हा दाखल झाला असून उपनिरीक्षक बावीस्कर पुढील तपास करीत असल्याचे पोलिसांनी सांगितले.

वडद गावावर शोककळा

या घटनेमुळे वडद गावावर शोककळा पसरली आहे. मयत गोदावरीबाई गायकवाड यांच्या पश्‍चात पती, दोन मुले, सुन, नातवंडे असा परिवार आहे. त्या वारकरी साहित्य परिषदेच्या हिंगोली तालुकाध्यक्ष होत्या.