गौराईंपुढे पहलगाम हल्ल्यासह ऑपरेशन सिंदूरचा देखावा: नागरिकांकडून कौतुक, गौरींच्या आगमनाने घाटनांद्रा‎गावात भक्तिमय वातावरण‎ – Chhatrapati Sambhajinagar News

.

महालक्ष्मी उत्सवाच्या निमित्ताने क्षिरसागर कुटुंब गेली १३ वर्षे विविध सामाजिक संदेश देणारे देखावे सादर करत आहे. यामध्ये स्वच्छ भारत अभियान, महाड सावित्री नदी दुर्घटना, कोल्हापूर पूरस्थिती, हर घर तिरंगा, जल जीवन मिशन, लाडकी बहिणी योजना अशा विषयांचा समावेश होता. यावर्षी पहलगाममधील दहशतवादी हल्ल्यानंतर भारताने पाकिस्तान आणि पीओकेमधील दहशतवादी तळांवर केलेल्या प्रत्युत्तरात्मक कारवाईचे हुबेहूब चित्रण करण्यात आले होते. ऑपरेशन सिंदूरमध्ये भारतीय वायुदल आणि सैन्याच्या विशेष तुकड्यांनी ९ टेरर लाँचपॅड्स उद्ध्वस्त केले. अनेक दहशतवादी ठार झाले. ड्रोन, मिसाईल्स आणि हवाई हल्ल्यांचा वापर करून ही कारवाई करण्यात आली. भारतीय जवानांच्या शौर्याला सलाम करणारा हा देखावा पाहण्यासाठी नागरिकांनी मोठी गर्दी केली.

महालक्ष्मी उत्सव तीन दिवस साजरा केला जातो. पहिल्या दिवशी आगमन, दुसऱ्या दिवशी मिष्टान्न भोजन आणि तिसऱ्या दिवशी पाठवणी होते. क्षिरसागर कुटुंबाने या उत्सवाला सामाजिक भान देत एक वेगळा आदर्श निर्माण केला आहे.

प्रतिनिधी | घाटनांद्रा मांगल्याचे प्रतीक असलेल्या जेष्ठा-कनिष्ठा गौराईंचे पूजन सोमवारी (दि. १) भक्तिभावाने करण्यात आली. घरोघरी मंगलमय वातावरणात गौराईंचे स्वागत झाले. सोमवारी ब्राह्मणांच्या मंत्रघोषात महापूजा पार पडली. त्यामुळे गावात सर्वत्र भक्तिमय वातावरण निर्माण झाले होते. ग्रामगुरुजी संजय शास्त्री यांच्या मंत्रोच्चारात रेवननाथ जोशी, अरविंद देशपांडे, दत्तात्रय गुरुजी, माधवराव मोरे, संजय कुलकर्णी यांच्यासह अनेक ग्रामस्थांच्या घरी श्रीमहालक्ष्मीची सपत्नीक महापूजा झाली. सामूहिक महाआरती करण्यात आली. सोळा प्रकारच्या भाज्या, कोशिंबीर, पंचामृत, खीर, पुरणपोळी यांचा नैवेद्य दाखवण्यात आला. गौरी गणपतीसमोर साष्टांग दंडवत घालून भाविकांनी चांगल्या पावसासाठी, सृष्टी सुजलाम सुफलाम होण्यासाठी प्रार्थना केली. तीन दिवस माहेरवाशीन म्हणून आलेल्या गौराईंच्या आगमनामुळे घराघरात आनंदाचे वातावरण होते. बाहेरगावी गेलेली कुटुंबेही या निमित्ताने एकत्र आली. सायंकाळी दर्शनासाठी आलेल्या महिलांनी श्रीमहालक्ष्मीच्या चरणी नतमस्तक होऊन हळदीकुंकू वाहिले. अनुराधा नक्षत्रावर आलेल्या गौराईंचे मंगळवारी बाळमुर्तीसह भावपूर्ण वातावरणात विसर्जन होणार आहे.