माधुरी हत्तीण आता नांदणीत परतणार?: सुप्रीम कोर्टाचा महत्वपूर्ण निर्णय, वनतारा व शासन मिळून सर्व सुविधा नांदणीत उपलब्ध होणार – Kolhapur News

.

माधुरी हत्तीणला वनतारा येथे पाठवण्याच्या सर्वोच्च न्यायालयाच्या पूर्वीच्या निर्णयावर पुनर्विचार करण्याची मागणी करणारी याचिका दाखल करण्यात आली होती. या याचिकेवर आज सुनावणी झाली. यावेळी राज्य सरकार, ‘वनतारा’ संस्था आणि नांदणी मठ यांनी संयुक्तपणे आपली बाजू मांडली.

राजू शेट्टींचा पेटावर चुकीची माहिती पसरवल्याचा आरोप

पेटाच्या वकिलांनी हत्तीची प्रकृती चिंताजनक असल्याचे सांगून मठात कोणत्याही वैद्यकीय सुविधा नसल्याचे न्यायालयाच्या निदर्शनास आणले. यावर न्यायालयानेही हत्तीणीचा उपचार नेमका कसा होईल, असा प्रश्न उपस्थित केला. मात्र माजी खासदार राजू शेट्टी यांनी सोशल मीडियावरील व्हिडिओंचा आधार देत, वनताराने हत्तीण निरोगी आणि आनंदी असल्याचे व्हिडीओजमधून दाखवून दिल्याचे सांगितले. तसेच त्यांनी पेटावर चुकीची माहिती पसरवण्याचा आरोपही केला.

सर्वोच्च न्यायालयाचा महत्त्वपूर्ण निर्णय

या सुनावणीदरम्यान नांदणी मठाने एक प्रस्ताव सादर केला. त्यानुसार, माधुरी हत्तीण आणि इतर हत्तींवर योग्य उपचार आणि देखभाल करण्यासाठी मठाची सात ते आठ एकर जमीन ‘वनतारा’च्या देखरेखीखाली उपलब्ध करून देण्याची तयारी दर्शवण्यात आली. या संपूर्ण प्रक्रियेवर सरकार लक्ष ठेवेल असे राजू शेट्टी यांनी सांगितले.

हा प्रस्ताव विचारात घेऊन, सर्वोच्च न्यायालयाने पूर्वीचा निर्णय बदलून माधुरीच्या भवितव्याचा निर्णय घेण्याचा अधिकार हाय पॉवर कमिटीकडे दिला आहे. कमिटीने सर्व वस्तुस्थिती समजून घेऊन आणि माधुरीच्या आरोग्याची काळजी घेऊन योग्य तो निर्णय घ्यावा, असे निर्देश न्यायालयाने दिले आहेत. या निर्णयामुळे आता उच्च न्यायालय आणि सर्वोच्च न्यायालयाचा अडथळा दूर झाला आहे, असेही राजू शेट्टी यांनी सांगितले.

पुढील पावले काय?

राजू शेट्टी यांनी दिलेल्या माहितीनुसार, माधुरीला पुन्हा नांदणी मठात आणण्यासाठी सोमवारपर्यंत हाय पॉवर कमिटीकडे अर्ज सादर केला जाणार आहे. हा अर्ज राज्य सरकार, ‘वनतारा’ आणि नांदणी मठ यांच्या वतीने संयुक्तपणे दाखल केला जाईल. या प्रयत्नांमुळे माधुरीला पुन्हा तिच्या जुन्या ठिकाणी आणण्याचा मार्ग मोकळा झाल्याची आशा निर्माण झाली आहे.