कल्याणमध्ये दारूच्या नशेत तरुणांची पिझ्झा डिलिव्हरी बॉयला बेदम मारहाण: हाय-प्रोफाइल सोसायटीतील धक्कादायक घटना सीसीटीव्हीत कैद – Mumbai News

.

मिळालेल्या माहितीनुसार, सोसायटीतील हे तीन तरुण डिलिव्हरी घेऊन येणाऱ्या कर्मचाऱ्यांशी मुद्दामहून वाद घालून त्यांना त्रास देत असतात. काल रात्री डॉमिनोजमधून पिझ्झाची ऑर्डर घेऊन एक डिलिव्हरी बॉय सोसायटीत आला असता, दारूच्या नशेत असलेल्या या तिघा तरुणांनी त्याच्यासोबत किरकोळ कारणावरून वाद घातला. या वादाचे रूपांतर हाणामारीत झाले. तिघांनी मिळून डिलिव्हरी बॉयला अचानक बेदम मारहाण केली. या हल्ल्यात डिलिव्हरी बॉय गंभीर जखमी झाला आहे. हा संपूर्ण प्रकार सीसीटीव्हीत स्पष्टपणे दिसत आहे.

पोलिसांत गुन्हा दाखल

या घटनेनंतर जखमी डिलिव्हरी बॉयने तातडीने कोळसेवाडी पोलिस ठाण्यात तक्रार दाखल केली आहे. पोलिसांनी या गंभीर प्रकरणाची दखल घेतली असून, आरोपींविरुद्ध पुढील कारवाई सुरू केली आहे. दरम्यान, वारंवार डिलिव्हरी बॉयसोबत होणाऱ्या या हिंसक वागणुकीमुळे परिसरातील रहिवाशांनी तीव्र संताप व्यक्त केला आहे. सोसायटीत दहशत पसरवणाऱ्या या तरुणांवर कठोर कारवाई होणार का, याकडे आता सर्वांचे लक्ष लागले आहे.

संभाजीनगरात तरुणाचा गळा चिरून खून

दुसरीकडे छत्रपती संभाजीनगरमध्ये जालना रोडवरील सेंट फ्रान्सिस शाळेच्या मैदानावर (14 ऑक्टोबर) रात्री तरुणाचा गळा चिरून खून करण्यात आला. रात्री साडेदहाच्या सुमारास हा प्रकार उघडकीस आला. सुरेश भगवान उंबरकर असे मृत तरुणाचे नाव आहे. प्राथमिक माहितीनुसार, सेंट फ्रान्सिस स्कूलच्या समोरील बाजूस दुकाने आहेत. त्यामागील मैदानावर एका तरुणाचा मृतदेह पडल्याची माहिती रात्री साडेदहाच्या सुमारास पोलिसांना समजली.

पोलिसांनी तातडीने घटनास्थळी धाव घेतली. मैदानावर एका तरुणाचा मृतदेह गळा चिरलेल्या अवस्थेत होता. पोलिसांपाठोपाठ फॉरेन्सिक लॅबचे पथकही घटनास्थळी दाखल झाले. रात्री उशिरापर्यंत पंचनामा सुरू होता. रात्री सव्वा नंतरही मृतदेह घटनास्थळी होता. पोलिस निरीक्षक निर्मला परदेशी, संभाजी पवार, कुंभार यांच्यासह मोठ्या संख्येने पोलिस घटनास्थळी दाखल झाले.