पुण्यातील जैन बोर्डिंग हॉस्टेलच्या जागेच्या कथित बेकायदेशीर विक्री प्रकरणात केंद्रीय राज्यमंत्री मुरलीधर मोहोळ यांनी केलेले स्पष्टीकरण शिंदे गटाचे नेते आणि माजी आमदार रवींद्र धंगेकर यांनी फेटाळून लावले आहे. मोहोळ यांनी केलेले सर्व व्यवहार ‘संशयास्पद’
.
पुण्यातील जैन बोर्डिंग हाऊसच्या जमिनीच्या कथित बेकायदेशीर विक्री प्रकरणात नाव आल्यानंतर मुरलीधर मोहोळ यांनी आज पत्रकार परिषद घेऊन सविस्तर स्पष्टीकरण दिले. त्यांनी कागदपत्र दाखवत माझा या व्यवहाराशी संबंध नसल्याचे सांगितले. तसेच रवींद्र धंगेकर यांच्यावर वैफल्यग्रस्त नेता म्हणत टीका केली. आता धंगेकर यांनी मुरलीधर मोहोळ यांनी पत्रकार परिषदेत केलेले स्पष्टीकरण ‘केविलवाणे आणि त्यात दम नसलेले’ होते, अशी टीका धंगेकर यांनी केली. “सगळे व्यवहार संशयास्पद आहेत, त्यात काळे आहे. त्यामुळे मोहोळ यांना राग येणे स्वाभाविक आहे. ते हतबल होते, कारण ते चुकीचे वागले,” असे धंगेकर म्हणाले.
नेमके काय म्हणाले रवींद्र धंगेकर?
मोहोळ यांनी ११ महिन्यांपूर्वी गोखले फर्ममधून बाहेर पडल्याचा केलेला दावा धंगेकरांनी खोटा ठरवला. ते म्हणाले, “गोखले यांच्या कंपनीत मोहोळ पार्टनर होते. आता ते राजीनामा दिला असं म्हणत आहेत, पण त्यांनी कधी आणि कुठं राजीनामा दिला? अजूनही ते त्या कंपनीमध्ये आहेत. आता विषय अंगावर येईल म्हणून ते पलटी खात आहेत.”
धंगेकर म्हणाले की, या जमिनीच्या व्यवहाराची सुरुवात २०२३ मध्ये झाली. त्या वेळी जैन ट्रस्टच्या पदाधिकाऱ्यांनी या जमिनीसाठी २३० कोटी रुपये मिळतील असा अंदाज व्यक्त केला होता. मात्र, ही जागा मूळतः १९५८ मध्ये जैन विद्यार्थ्यांसाठी घेण्यात आली होती आणि संस्थेच्या नियमावलीनुसार ती विकता येत नाही. धंगेकरांच्या मते, मोहोळ आणि गोखले यांनी मिळून आधी हॉस्टेल परिसरात जाऊन पाहणी केली आणि नंतर ही जागा हडप करण्याचा डाव आखला.
धंगेकरांचा आरोप आहे की, मोहोळ यांचा गोखले बिल्डर्ससोबत प्रत्यक्ष सहभाग होता आणि त्यांनी कंपनीतून बाहेर पडलो असल्याचा दावा केला असला, तरी ते अजूनही अप्रत्यक्षरित्या संबंधित आहेत. “टेंडर प्रक्रिया मोहोळ यांना नवीन नाही, महापालिकेत असतानाही त्यांनी असंच काम केलं होतं. बडेकर आणि गोखले यांनी मिळून हा व्यवहार आखला. यात तीन कंपन्यांचा समावेश होता आणि टेंडर मॅनेज करून हा व्यवहार पूर्ण करण्यात आला,” असा आरोप त्यांनी केला.
मोहोळ यांनी या प्रकरणात गोखले आणि बडेकर यांच्यावर कारवाईची मागणी न करता उलटपक्षी त्यांना पाठीशी घातल्याचा आरोपही धंगेकरांनी केला. “या व्यवहारात सहभागी असलेल्या सगळ्या बिल्डरांचा कोथरूडशी संबंध का? हा केवळ योगायोग आहे की काहीतरी संगनमत?” असा सवाल त्यांनी उपस्थित केला. याप्रकरणात पंतप्रधान नरेंद्र मोदी, केंद्रीय गृहमंत्री अमित शाह आणि उपमुख्यमंत्री देवेंद्र फडणवीस यांनी हस्तक्षेप करून ईडी मार्फत चौकशी करावी, अशी मागणीही रवींद्र धंगेकर यांनी केली.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
