उर्मिला मातोंडकर- महेश मांजरेकर चालतात: पण कोठारेंनी मोदींचे कौतुक केल्याने उद्धवसेनेला इंगळ्या डसल्या – अभिनेत्री मेघा धाडे

मराठी चित्रपटसृष्टीतील ज्येष्ठ अभिनेते आणि दिग्दर्शक महेश कोठारे सध्या सोशल मीडियावर आणि राजकीय वर्तुळात चर्चेचा विषय ठरले आहेत. कारण काही दिवसांपूर्वी त्यांनी भारतीय जनता पक्षाला जाहीर पाठिंबा दर्शवला. त्यानंतर विरोधकांकडून त्यांच्यावर टीकेचा भडिमार सुरू झाला आहे. अशातच आता मराठी अभिनेत्री मेघा धाडे महेश कोठारेंच्या समर्थनासाठी पुढे आल्या आहेत. उर्मिला मातोंडकर, महेश मांजरेकरांचा उल्लेख करत ठाकरे गटावर निशाणा साधला. त्या दोघांनी निवडणूक लढवल्यास चालते, पण महेश कोठारेंनी मोदींची तारीफ केल्याने उद्धव सेनेला इंगळ्या डसल्या, असा टोला मेघा धाडे यांनी लगावला.

दिवाळीनिमित्त भाजपच्या वतीने आयोजित एका कार्यक्रमात महेश कोठारे यांनी हजेरी लावली होती. त्यावेळी त्यांनी नरेंद्र मोदी आणि भाजपवर स्तुतीसुमने उधळली. मी मोदी भक्त असून, मुंबई महापालिकेच्या निवडणुकीत भाजपचेच कमळ फुलणार, असे वक्तव्य कोठारे यांनी केले होते. त्यांच्या या वक्तव्यानंतर शिवसेना उद्धव ठाकरे गटाच्या नेत्यांनी टीका केली. महेश कोठारे नक्की मराठीच आहेत ना? मला शंका वाटते, असा टोला संजय राऊतांनी लगावला होता. अपघात प्रकरणात सूनबाई अडकल्या आहेत, म्हणून ते अशी मुक्ताफळे उधळतायत, अशा शब्दांत किशोरी पेडणेकरांनी टीका केली होती. आता अभिनेत्री आणि ‘बिग बॉस मराठी’ची विजेती मेघा धाडेने महेश कोठारेंची बाजू घेतली आहे.

मेघा धाडे हिने सोशल मीडियावर भली मोठी पोस्ट लिहित महेश कोठारेंना समर्थन दिले. तसेच शिवसेना ठाकरे गटावर हल्ला चढवला. या पोस्टमध्ये तिने महेश कोठारेंना देखील टॅग केले आहे. तसेच त्यांना विरोधकांकडून होणाऱ्या टीकेकडे दुर्लक्ष करण्यास सांगितले.

मेघा धाडेची सोशल मीडिया पोस्ट काय?

मेघा धाडे म्हणाली की, “अभिनेत्री उर्मिला मातोंडकरने उद्धव सेना जॉइन केली होती, तेव्हा कोणत्याही भाजप प्रवक्त्याने तिच्या व्यक्तिस्वातंत्र्यावर आक्षेप घेतला नव्हता! सुप्रसिद्ध दिग्दर्शक महेश मांजरेकरने तर मनसेच्या तिकिटावर लोकसभा लढवली होती, तरी कोणी आक्षेप घेतला नाही! परंतु महेश कोठारेंनी मोदींची तारीफ केली की, उद्धव सेनेला इंगळ्या डसल्या! कोठारेंवर टीकेची झोड उठवली गेली! त्यांच्या मराठीपणावर देखील शंका घेण्यात आली!”

“हे असे झाले कारण कोठारे जे बोलले ते मनापासून बोलले कोणत्या तिकीटाच्या लालसेपोटी, कोणाचे पाकीट मिळवण्यासाठी ते असे बोलले नाही एक सामान्य मुंबईकरांची जी भावना आहे जो मुंबईकर आधी रस्त्यावर धक्के खायचा तो आता मेट्रोत गार वाऱ्यात वेगाने प्रवास. करतोय जो मुंबईकर आधी ट्रॅफिक मध्ये अडकायचा आता तो अटल सेतूवरून सुसाट धावतोय त्या मुंबईकरांच्या भावनांचे प्रगटीकरण कोठारेंच्या भाषणात झाले आणि म्हणूनच उद्धव सेनेच्या पायाखालची जमीन सरकली! आणि हे सत्यात देखील उतरणार आहे.”, असे मेघा धाडे म्हणाली आहे.

या पोस्टच्या कॅप्शनमध्ये मेघा धाडेनं लिहिले की, “महेश सर तुम्ही जे बोललात ते तुमचे मत होते, जे तुम्ही मनापासून व्यक्त केले, आम्हा सगळ्यांना तुमच्या मताचा शंभर टक्के आदर आहे . बाकी टीका करणाऱ्यांकडे दुर्लक्ष करा, कारण कुछ तो लोग कहेंगे लोगो का काम है कहना छोडो बेकार की बातो को, हमे तो सच के साथ ही हैना…”