इनसाइड स्टोरी: शिंदेंची मोदींसोबतची भेट ९० मिनिटे चालली; निधीसह मुंबई – ठाण्यात सन्मानजनक जागावाटपासाठी घातले साकडे – Mumbai News

.

शिंदेसेनेचे मंत्री आणि आमदारांचे म्हणणे आहे की, त्यांच्या मतदारसंघातील विकासकामांना पूर्वीप्रमाणे निधी उपलब्ध होत नाही. याची तक्रार शिंदेंनी थेट पंतप्रधानांकडे केली. तसेच राज्यातील ग्राउंड रिॲलिटी रिपोर्ट सादर करत मुंबई, ठाण्यासह सर्व मनपांत सन्मानपूर्वक जागावाटपासाठी साकडे घातले. ठाणे जिल्ह्यात भाजपचे कॅबिनेट मंत्री गणेश नाईक ज्या पद्धतीने शिंदेसेनेवर वर्चस्व गाजवण्याचा प्रयत्न करत आहेत, त्याबद्दलची तीव्र नाराजी शिंदेंनी मोदींकडे बोलून दाखवली. तसेच केंद्रीय राज्यमंत्री मुरलीधर मोहोळ यांच्या जमीन घोटाळ्याविषयी पक्षाची भूमिका स्पष्ट केल्याचे म्हटले जात आहे, अशी माहिती सूत्रांनी दिली.

मोदींना संत तुकारामांची मूर्ती भेट

शिंदेंनी मोदींना वारकरी संप्रदायाचे प्रतीक असलेली संत तुकाराम महाराजांची मूर्ती भेट दिली. “महाराष्ट्र ही संतांची भूमी आहे आणि मोदी नेहमी महाराष्ट्रातील संतांचा उल्लेख करतात,’ असे सांगत कार्तिकी एकादशीच्या पार्श्वभूमीवर ही भेट दिल्याचे त्यांनी स्पष्ट केले.

भेटीमुळे जागावाटपात लाभ

ठाकरे बंधू एकत्र आल्यावर मुंबई, ठाणे व इतर मनपात काय होऊ शकते याचा अहवाल शिंदेंनी थेट मोदींना दिला. त्यातील काही मुद्दे मोदींना मान्य झाल्यास जागावाटपात शिंदेसेनेला झुकते माप मिळू शकते.

मोदींसाठी शिंदे महत्त्वाचेच

राजकीय निरीक्षकांच्या मते, राज्यातील भाजपचे नेते शिंदेंविषयी काहीही बोलत असले तरी मोदी, शाह यांच्यासाठी शिंदे अत्यंत महत्त्वाचे आहेत हे या भेटीतून स्पष्ट झाले.

मोहोळ – धंगेकर वादात मध्यस्थी करणार – शिंदे

मोदींच्या भेटीनंतर पत्रकारांशी बोलताना शिंदे म्हणाले की, एनडीए आणि महायुतीचे गठबंधन म्हणजे एकच विचारधारा आणि विकासाचा अजेंडा घेऊन पुढे जाणारे एकत्र कुटुंब आहे. महायुतीत ‘मिठाचा खडा’ पडू नये यासाठी सर्वांनी काळजी घ्यावी. पुण्यातील शिवसेना नेते रवींद्र धंगेकर आणि केंद्रीय मंत्री मोहोळ यांच्यातील वादाविषयी आवश्यकता भासल्यास मी स्वतः धंगेकरांशी बोलेन.