शिवसेना ठाकरे गटातील अंतर्गत गटबाजी टोकाला पोहोचली आहे. जिल्हाप्रमुखांनी गटनेत्यांवर गद्दारीचा आरोप केल्यानंतर शाब्दिक चिखलफेक सुरू झाली आहे. विधानसभा निवडणुकीत पक्षाच्या उमेदवाराच्या विरोधात बंडखोरी अन् मनपात आईची माघार घेऊन जिल्हाप्रमुखांनीच गद्दारी केल्याचा आरोप इब्राहिम पटेल यांनी केला. तर गटनेते पटेल यांनी संपर्क प्रमुखांना फोन करून स्वीकृतच्या प्रस्तावासाठी प्रत्येकी 20 लाखांची मागणी केल्याचा पलटवार जिल्हाप्रमुख कुलभूषण पाटील यांनी केला. महापालिकेत स्वीकृतनगर सेवकाच्या एका जागेसाठी ठाकरे गटाच्या दोन्ही गटांकडून वेगवेगळे प्रस्ताव दाखल करण्यात आले आहेत. जिल्हाप्रमुख कुलभूषण पाटील यांनी इब्राहिम पटेल यांच्यावर शिस्तभंगाच्या कारवाईचे संकेत दिल्याने खळबळ उडाली. मात्र, पटेल यांनी हे सर्व दावे फेटाळून जिल्हाप्रमुखांच्या अधिकारावर प्रश्नचिन्ह उपस्थित केले आहे. आम्ही पाच पैकी चार नगरसेवक एकत्र आहोत. गटनेता बदलण्यासाठी सर्व नगरसेवकांची विभागीय आयुक्तांकडे उपस्थिती अनिवार्य असते. त्यामुळे माझ्यावर कारवाई होऊ शकत नाही. पक्षाचे वरिष्ठ नेते खासदार संजय राऊत आणि विनायक राऊत यांच्याशी चर्चा झाली आहे. लवकरच मुंबईत जाऊन पक्षप्रमुख उद्धव ठाकरेंची भेट घेणार आहे, अशी माहिती इब्राहिम पटेल यांनी दिली. पक्षादेश हाच महत्त्वाचा पक्षाचा गटनेता बदलाचा निर्णय पक्षप्रमुखांच्या मान्यतेने पक्षाच्या सचिवांनी दिला आहे. तसे पत्र विभागीय आयुक्तांकडे दिले आहे. गटनेता बदलाचा निर्णय आम्ही घेतला नसून पक्षाचा आदेश आहे. पटेल यांनी संपर्क प्रमुखांना फोन करून स्वीकृतचा प्रस्ताव देण्यासाठी प्रत्येकी 20 लाखांची मागणी केली आहे. ही गद्दारी नव्हेतर दुसरे काय आहे?- कुलभूषण पाटील, जिल्हाप्रमुख, ठाकरे गट आम्ही गद्दारी केली नाही मी स्वीकृत सदस्याचा प्रस्ताव दाखल करून कोणतीही गद्दारी केलेली नाही. मी पक्षासोबतच आहे. जळगाव विधानसभा निवडणुकीत पक्षाच्या उमेदवाराच्या विरोधात अपक्ष कोण लढले? मनपा निवडणुकीत भाजप उमेदवारविरोधात आईचा अर्ज कोणी मागे घेतला? भाजप-शिवसेनेचे 12 नगरसेवक बिनविरोध कसे निवडून आले? हे तपासायला हवे. इब्राहिम पटेल, नगरसेवक, ठाकरे गट
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
