Maharashtra Weather News : मागील 24 तासांपासून राज्यावर पावसाळी ढगांचं सावट असून ही परिस्थिती किंबहुना हे चित्र पुढील 24 तासांमध्येही कायमच राहील असा स्पष्ट अंदाज हवामानशास्त्र विभागानं वर्तवला आहे. हवामान खात्याने वर्तवलेल्या अंदाजाप्रमाणे मंगळवारी मध्यरात्री अकोला शहरासह जिल्ह्यातील काही भागात मेघगर्जनेसह अवकाळी पावसाने हजेरी लगावली. रात्री दोन वाजताच्या दरम्यान अचानक आलेल्या अवकाळी पावसामुळे शेतातील कांदा, भाजीपाला , आंबा, लिंबू, टरबूज इत्यादी फळ पिकांना फटका बसण्याची शक्यता आहे. तर शहरातील अनेक भागात पावसामुळे वीज पुरवठा खंडित झालाय.
हीच स्थिती मागील 24 तासांमध्ये मध्य महाराष्ट्रासह उत्तर महाराष्ट्रातील काही भागांमध्ये पाहायला मिळाली होती. सध्या राज्याच्या हवामानाचा आढावा घ्यायचा झाल्यास, दिवसभर ढगाळ वातावरण; रात्री मात्र पावसाचा हलका शिडकावा अशीच दिवस असून, मुंबई शहर आणि उपनगरांसह कोकण किनारपट्टी भागांमध्ये मात्र आर्द्रतेचं प्रमाण प्रचंड वाढल्यामुळं उष्मा अधिक तीव्रतेनं जाणवताना दिसत आहे. त्यातच वातावरणातील बदल, वाढलेली आर्द्रता; या साऱ्यामुळं मुंबई महानगर प्रदेशातील हवामान ढगाळ असल्याचं पाहायला मिळत आहे.
पाऊस आणि गारपिटीचा अलर्ट
राज्यात सध्या मध्य महाराष्ट्र, विदर्भ, मराठवाड्यात पाऊस आणि गारपिटीचा ऑरेंज अलर्ट जारी करण्यात आला आहे. तर, राज्याच्या इतर भागांमध्ये पावसाचा यलो अलर्ट जारी करत नागरिकांना सतर्क करण्यात आलं आहे. पुढील 24 तासांसाठी राज्यात अहिल्यानगर, नाशिक, पुणे, सातारा, , छ. संभाजीनगर, जालना, बीड जिल्ह्यांसह मुंबई शहराला पावसाचा इशारा देण्यात आला आहे.
अचानक कुठून आला हा पाऊस?
मध्य महाराष्ट्रावर सध्या चक्राकार वाऱ्यांची स्थिती कायम असून, त्यामुळं कर्नाटक, तामिळनाडू, छत्तीसगढ भागांमध्ये कमी दाबाचा पट्टा तयार झाला आहे. या पट्ट्यासह अरबी समुद्र आणि बंगालच्या उपसागरावर तयार झालेल्या बाष्पयुक्त वाऱ्यांमुळं महाराष्ट्रात पावसासाठी पूरक वातावरणनिर्मिती होताना दिसत आहे.
राज्यावर पावसाचं सावट असलं तरीही राज्याच्या बहुतांश भागांमध्ये उष्मा काही कमी झालेला नाही. त्यामुळं एकीकडून ढगाळ वातावरणानं कोंडी केलेली असतानाच दुसरीकडे मात्र तापमानाचा वाढता आकडा अडचणी आणखी वाढवताना दिसत आहे. हवामानाच्या या चित्रविचित्र रुपांमुळं राज्यातील नागरिकांच्या आरोग्यावरही परिणाम होताना दिसत आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
