Veena Peter Success Story: अनेकदा आपल्या आवडीची गोष्ट पाहिजे तेव्हा मिळत नाही. मग ग्राहक म्हणून आपला हिरमोड होतो. अशावेळी हव्या त्या वस्तूंची दुकाने जवळ का नाहीत असा प्रश्न ग्राहक म्हणून आपल्याला पडतो. असाच प्रश्न एका महिलेला पडला आणि यातूनच एका व्यवसायला सुरुवात झाली. जगातील अनेक व्यवसाय फक्त गरजेमुळे सुरू झाले. बेंगळुरू येथील रहिवासी वीणा पीटर यांना एका व्यवसायाची कल्पना सुचली त्यांनी ती प्रत्यक्षात आणली. यामाध्यमातून त्या आज लाखोंची कमाई करतायत.
वीणा पीटर या लांब केसांच्या बाहुल्या बनवतात. वीणा यांची मुलगी ताराला लांब केसांची बाहुली हवी होती. पण बाजारात कुठेच वीणा यांना लांब केसांची बाहुली मिळाली नाही. तेव्हा त्यांनी हा व्यवसाय सुरू केला. बाजारात काही बाहुल्या होत्या पण त्यांचा दर्जा खूपच खराब होता. त्यांचे केस सहज तुटायचे आणि बाहुलीही मध्येच तुटायची. अशा परिस्थितीत मग वीणा यांनीच बाहुल्या बनवायला सुरुवात केली.
चांगल्या दर्जाच्या आणि टिकाऊ बाहुल्या वीणा बनवू लागल्या. वीणा यांनी आवड म्हणून हा व्यवसाय सुरू केला होता. पण आज त्या महिन्याला लाखो रुपये कमवतायत. ‘ताराज डॉल हाऊस’ असे त्यांच्या बाहुल्यांच्या ब्रँडचे नाव आहे.
मुलांच्या आरोग्याचीही काळजी
वीणा यांनी डिसेंबर 2022 मध्ये ‘ताराज डॉल हाऊस’ हा ब्रँड लाँच केला. पर्यावरणपूरक असण्यासोबतच मुलांच्या आरोग्यावरह कोणताही विपरीत परिणाम होणार नाही, अशा बाहुल्या येथे बनवल्या जातात. सर्व बाहुल्या कापडाच्या बनवलेल्या आहेत. त्यांचे केस लोकरीपासून बनवलेले असतात. बाहुल्या बनवण्यासाठी वीणा देशभरातील विविध विक्रेत्यांकडून कच्चा माल खरेदी करतात.
बाहुल्यांसह डॉल हाऊस
वीणा त्यांच्या ब्रँड अंतर्गत पारंपारिक बाहुल्यांव्यतिरिक्त बाहुल्यांचे घर देखील विकतात. बाहुल्यांची घरे लाकडापासून बनलेली असतात. यामुळे ती मुलांसाठीदेखील पर्यावरणपूरक असतात. प्रत्येक बाहुलीची उंची आणि रंग वेगवेगळा असतो तसेच त्वचेचा रंगही बदलतो. त्यामुळे बाहुली खूपच वेगळी आणि सुंदर दिसते. नीना बाहुली ही त्यांची मुख्य बाहुली असून या बाहुल्यांची उंची 6 इंच ते 18 इंचांपर्यंत असते.
500 रुपयांपासून सुरू
प्रकार आणि व्हेरिएंटनुसार बाहुलीच्या किंमती कमी जास्त होतात. ‘ताराज डॉल हाऊस’मध्ये तुम्हाला 500 रुपयांपासून ते 3 हजार 500 रुपयांपर्यंत बाहुल्या मिळतात. नीना बाहुलीची किंमत 1 हजार रुपये आहे. बाहुल्यांच्या घरांची श्रेणीदेखील वेगळी आहे. बाहुलीच्या वॉर्डरोब सेटची किंमत 3 हजार 500 रुपये आहे.
दरमहा लाखोंची कमाई
मी दरमहा सुमारे 200 ते 300 बाहुल्या विकते. याशिवाय कपाटे आणि इतर गोष्टी देखील विकल्या जातात. सुरुवातीला मी फक्त ऑफलाइन बाहुल्या विकत असे. अलिकडे ऑनलाइन प्लॅटफॉर्म सुरू करण्यात आल्याते वीणा सांगतात. वीणा यांचे मासिक उत्पन्न सुमारे 2 लाख रुपये आहे. म्हणजेच वार्षिक उत्पन्न सुमारे 24 लाख रुपये आहे. वीणा यांना त्यांचा बाहुल्यांचा व्यवसाय भारताबाहेर न्यायचाय. यासाठी त्या योजना आखत आहेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
