Maharashtra Weather News : मागील 48 तासांपासून राज्याच्या काही भागांमध्ये सातत्यानं तापमानवाढ होत असतानाच काही भाग मात्र अवकाळीचा तडाखा सहन करताना दिसत आहे. एकिकडे अवकाळीचा मारा आणि दुसरीकडे वादळी पाऊस या एकंदर परिस्थितीमुळे राज्यातील बहुतांश जिल्ह्यांमध्ये तापमानातील चढ- उतार पाहायला मिळत आहेत. हवामान विभागाच्या माहितीनुसार राजच्याच्या विदर्भ आणि मराठवाड्याच्या भागाला पुढील 24 तासांसाठी अवकाळी पावसाचा इशारा जारी करण्यात आला आहे. या भागांमध्ये विजांच्या कडकडाटासह पावसाची हजेरी असेल असाही इशारा देण्यात आल्यानं नागरिकांच्या चिंतेत भर पडली आहे.
मराठवाडा आणि विदर्भातील या स्थितीचे थेट परिणाम राज्याच्या उर्वरित भागांवर होणार असून, मध्य आणि पश्चिम महाराष्ट्रात आकाश अंशत: ढगाळ राहील असा अंदाज वर्तवण्यात आला आहे. दरम्यान सध्या राज्याच्या गिरीस्थानांनाही वाढत्या उष्णतेचा तडाखा बसताना दिसत असल्यामुळं हिल स्टेशन ‘हिट’ स्टेशन होताना दिसत आहेत.
थंड हवेच्या ठिकाणीही उष्ण वाऱ्यांची हजेरी
एकिकडे होरपळ वाढत असतानाच अनेकांचे पाय गिरीस्थानांकडे वळतात. मात्र हा निर्णय यंदाच्या उकाड्यात महागात पडू शकतो. कारण राज्यातीलमहाबळेश्वर, पाचगणी, माथेरान, चिखलदरा थंड हवेच्या भागांवरही उष्णतेचं सावट पाहायला मिळत आहे. लोणावळ्याचा पारासुद्धा 38 अंशांवर पोहोचला असून, इगतपुरी आणि तोरणमाळ इथं तापमान 39 अंशांवर स्थिरावलं आहे. ज्यामुळं ही थंड हवेची ठिकाणंसुद्धा दिलासा देताना दिसत नाहीयेत.
सध्याच्या घडीला देशात मध्य प्रदेशापासून विदर्भासह मराठवाडा, कर्नाटक, तामिळनाडू ते अगदी मन्नारच्या आखातापर्यंत कमी दाबाचा पट्टा सक्रिय आहे. शिवाय मध्य प्रदेशासह समुद्रसपाटीपासून नजीकच्या भागांमध्ये साधारण 900 मीटर उंचीवर चक्राकार वारे वाहताना दिसत आहेत, ज्यामुळं महाराष्ट्रात पावसासाठी पूरक वातावरणनिर्मिती होत असून राज्याच्या बहुतांश भागांमध्ये वादळी पावसासह गारपिटीचा इशारा देण्यात आला आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
