कर्नाटकातील विजापूर जिल्ह्यातून एक अत्यंत धक्कादायक आणि थरारक घटना समोर आली आहे. जिल्ह्यातील गोविंदपूर (चडचण) या ठिकाणी झालेल्या भीषण गोळीबारात तब्बल सहा जणांची निर्घृण हत्या करण्यात आली आहे. प्राथमिक माहितीनुसार, हे भयानक हत्याकांड जमिनीच्या जुन्या वादातून घडले असल्याचे समोर येत आहे. एकाच वेळी आणि एकाच कारणावरून सहा जणांचे प्राण गेल्याने संपूर्ण विजापूर जिल्ह्यात एकच खळबळ उडाली असून, परिसरात मोठी हळहळ व्यक्त केली जात आहे. घटनेची माहिती मिळताच पोलिसांनी तातडीने घटनास्थळी धाव घेतली असून, परिसराचा ताबा घेतला आहे. सध्या पोलिसांकडून या सामूहिक हत्याकांडाचा सखोल तपास सुरू करण्यात आला असून, आरोपींचा शोध घेतला जात आहे. गोळीबार करत सहा जणांची निर्घृण हत्या विजापूर जिल्ह्यातील चडचाण तालुक्यातील गोविंदपूर गावात शुक्रवारी सायंकाळी एक अत्यंत भीषण आणि थरारक घटना घडली. गावात आलेल्या अज्ञात हल्लेखोरांनी थेट गोळीबार करत सहा जणांची निर्घृण हत्या केली. प्राथमिक माहितीनुसार, गोविंदपूर गावातील निराळे आणि गुळगी (गोलगी) या दोन कुटुंबांमध्ये गेल्या अनेक दिवसांपासून जमिनीच्या कारणावरून वाद सुरू होता. याच जुन्या वैमनस्यातून हा रक्तरंजित हल्ला झाल्याचा दाट संशय व्यक्त करण्यात येत आहे. पोलिसांचा मोठा फौजफाटा तैनात या भयंकर गोळीबारात चंदू निराळे, दुंडप्पा निराळे, शिवपुत्र निराळे, राहुल निराळे, समर्थ निराळे आणि शब्बीर नदाफ यांच्यासह आणखी एका व्यक्तीचा जागीच मृत्यू झाला आहे. एकाच वेळी सहा जणांचे प्राण गेल्याने सीमाभागातील नागरिकांमध्ये मोठी भीती निर्माण झाली असून, गावात सध्या तणावपूर्ण शांतता आहे. घटनेचे गांभीर्य ओळखून पोलिसांचा मोठा फौजफाटा तात्काळ गावात दाखल झाला असून, संपूर्ण परिसरात सुरक्षेच्या दृष्टीने कडेकोट बंदोबस्त तैनात करण्यात आला आहे. अज्ञात हल्लेखोरांचा शोध सुरू या सामूहिक हत्याकांडामुळे संपूर्ण विजयपूर जिल्हा हादरून गेला असून, भिमातीर परिसरात पुन्हा एकदा रक्तपाताची पुनरावृत्ती झाल्याची चर्चा नागरिकांमध्ये सुरू आहे. या घटनेचे गांभीर्य ओळखून वरिष्ठ पोलिस अधिकाऱ्यांनी तातडीने घटनास्थळी भेट देऊन तपासाला सुरुवात केली आहे, तसेच पसार झालेल्या अज्ञात हल्लेखोरांचा शोध घेण्यासाठी पोलिसांची विशेष पथकेही तैनात करण्यात आली आहेत. दरम्यान, या भयंकर घटनेबाबत पोलिसांकडून अद्याप कोणतीही अधिकृत माहिती आणि मृतांची संपूर्ण ओळख अधिकृतरीत्या जाहीर करण्यात आलेली नाही.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
