शिवसेना उद्धव बाळासाहेब ठाकरे पक्षाचे नेते विनोद घोसाळकर यांच्या स्नुषा तेजस्वी घोसाळकर यांची मुंबई जिल्हा बँकेच्या संचालक मंडळावर नियुक्ती झाली आहे. त्यामुळे ठाकरे गटावर कथित नाराज असणाऱ्या तेजस्वी यांचा भाजपमध्ये प्रवेश निश्चित झाल्याचा दावा केला ज
.
तेजस्वी घोसाळकर या गत काही महिन्यांपासून ठाकरे गटावर नाराज असल्याची चर्चा आहे. त्यांनी मध्यंतरी उद्धव ठाकरे यांची भेट घेतली होती. त्यात त्यांची नाराजी दूर झाल्याचे समजले जात होते. पण शुक्रवारी अचानक त्यांची मुंबई जिल्हा बँकेच्या संचालकपदी नियुक्ती झाल्याने त्या भाजपच्या वाटेवर असल्याची चर्चा नव्याने सुरू झाली. भाजप नेते प्रवीण दरेकर यांनी दिलेल्या माहितीनुसार, दिवंगत अभिषेक घोसाळकर हे मुंबई बँकेच्या संचालकपदी होते. त्यांच्या जागी आता त्यांच्या पत्नी तेजस्वी यांची नियुक्ती करण्यात आली आहे.
बीएमसी निवडणूक डोळ्यापुढे ठेवून नियुक्ती
प्रवीण दरेकर यासंबंधी म्हणाले, अभिषेख घोसाळकर हे मुंबई बँकेचे संचालक होते. त्यांच्या हत्येनंतर रिक्त झालेल्या जागेवर नेमणूक करण्याचा अधिकार संचालक मंडळाला असतो. त्यानुसार सद्भावना म्हणून संचालक मंडळाने एकमताने तेजस्वी घोसाळकर यांची संचालक म्हणून बँकेवर नियुक्ती केली. ही रिक्त जागा भरणे कायदेशीररित्या क्रमप्राप्त होते. त्यानुसार ही नियुक्ती करण्यात आली आहे.
उल्लेखनीय बाब म्हणजे मुंबै बँक ही मुंबईतील सहकार क्षेत्रातील एक अग्रणी बँक आहे. या बँकेच्या संचालक मंडळावर भाजप, राष्ट्रवादी काँग्रेस, शिवसेना ठाकरे गट आदी विविध पक्षांचे नेते आहेत. पण तेजस्वी घोसाळकर यांची नियुक्ती ऐन मुंबई महापालिका निवडणुकीच्या तोंडावर करण्यात आल्यामुळे भाजपने तेजस्वी यांच्या माध्यमातून उद्धव ठाकरे यांना झटका देण्याची व्युहरचना आखल्याचे स्पष्ट होते.
दरेकरांची राज व उद्धव ठाकरेंवर टीका
दुसरीकडे, प्रवीण दरेकर यांनी यावेळी मराठीचे राजकारण करणाऱ्या उद्धव व राज ठाकरे यांच्यावरही टीका केली. ते म्हणाले, विधानसभा निवडणुकीत भाजपला मोठा जनादेश मिळाला. भाजपला पाकिस्तानच्या नव्हे तर मराठी माणसांनीच मतदान केले होते. मागच्या महापालिका निवडणुकीत भाजपच्या जवळपास 84-85 जागा निवडून आल्या होत्या. त्यावेळीही भाजपला मराठी माणसानेच मतदान केले. आत्ता मराठीच्या नावावर तुम्ही (ठाकरे) राजकारण करत आहात. पण लोकांचा तुमच्यावर विश्वास राहिला नाही. याऊलट लोकांचा देवेंद्र फडणवीस यांच्या सरकारवर मोठा विश्वास आहे.
बाळासाहेबांचा विचार एकनाथ शिंदेंसोबत
प्रवीण दरेकर यांनी यावेळी बाळासाहेब ठाकरे यांचे विचार एकनाथ शिंदेंसोबत असल्याचाही दावा केला. ते म्हणाले, एकनाथ शिंदे यांनी खऱ्या अर्थाने बाळासाहेबांचा मराठी व हिंदुत्वाचा विचार पुढे नेत आहेत. उद्धव ठाकरे यांनी या विचाराला यापूर्वीच तिलांजली दिली आहे. त्यामुळे मराठी माणूस स्वाभाविकपणे महायुतीच्याच मागे उभा राहील यावर आमचा विश्वास आहे. त्यामुळे राज व उद्धव ठाकरे एकत्र आल्याने काय होईल? हा त्यांचा विषय आहे. मराठी माणसांसाठी काहींनी केवळ वल्गना केल्या. आम्ही थेट कृती केली. त्यामुळे मराठी माणूस आमच्यामागे ठामपणे उभा राहील यात कोणतीही शंका नाही. मराठी भाषेला अभिजात दर्जा देण्याचे काम फडणवीस यांच्या पुढाकाराने पंतप्रधान नरेंद्र मोदी यांनी केले, याची जाणीवही मराठी माणसांना निश्चितपणे आहे, असे ते म्हणाले.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
