पुण्यात आणखी एक विवाहिता हुंड्याची बळी: 4 तोळे सोने, 10 लाख खर्च करूनही सासरच्यांकडून छळ; 22 वर्षीय तरुणीची आत्महत्या – Pune News

.

दीपाने लग्न झाल्यानंतर सुमोर महिनाभरातच हुंड्यामुळे होणाऱ्या त्रासाला कंटाळून गळफास घेऊन आयुष्य संपवले. या घटनेमुळे पुन्हा एकदा पुणे हादरले आहे. याप्रकरणी दीपाचे वडिल गुरुसंगप्पा म्यागेरी यांनी हडपसर पोलिस ठाण्यात दिलेल्या तक्रारीवरून पतीसह सासू, सासरे, दीर यांच्यावर गुन्हा दाखल करण्यात आला आहे.

पोलिसांकडून प्राप्त माहितीनुसार, पोलिसांनी दिलेल्या माहितीनुसार, दीपा आणि प्रसाद यांचा विवाह 18 एप्रिल 2025 रोजी कर्नाटकातील विजयपूर येथील बागेवाडीतील बसव मंगल कार्यालयात पार पडला. लग्नामध्ये दीपाच्या वडिलांनी लेकीच्या सासरच्या मंडळींना हुंडा म्हणून प्रसादला 4 तोळे सोने दिले होते. तसेच अंदाजे 10 लाख रुपयांचा खर्च करत मानपानासह लग्न लावून दिले होते.

लग्नाच्या दुसऱ्याच दिवशी दीपा पुण्यात आली. मात्र, त्याच दिवसापासून पती प्रसाद व त्याची आई सुरेखा यांच्याकडून हुंड्याच्या नावाखाली छळ सुरू झाला. लग्नात भांडी, फ्रीज इतर वस्तू दिल्या नाहीत, यासह मानपान केला नाही म्हणून वाद घालून तिला शिवीगाळ आणि मारहाण केली, असा आरोप दीपाच्या वडिलांनी केला.

दीपाने तिच्या वडिलांना ही हकीगत सांगितली. सासरच्या जाचाला कंटाळून ती माहेरी निघून गेली. परंतु, त्यानंतर दीपाच्या सासऱ्याने तिची समजूत घातली आणि तिला पुन्हा पुण्यात घेऊन आले. त्यानंतर 18 मे रोजी दीपाने वडिलांना फोन केला व रडत लग्नात भांडी सामान दिले नाही, या कारणावरून प्रसाद, दीर, सासू आणि सासरे शिवीगाळ आणि मारहाण करत छळ करत असल्याचे सांगितले. त्यानंतर, दीपाच्या वडिलांनी मी पुण्यात येतो व वाद सोडवितो, असे सांगून तिची तात्पुरती समजूत काढली. मात्र, दुसऱ्याच दिवशी 19 मे रोजी दीपाने हडपसर मध्ये वास्तव्यास असलेल्या आपल्या घरात गळफास लावून आत्महत्या केली.

लग्नाच्या महिनाभरातच दीपाने टोकाचे पाऊल उचलल्याने तिच्या कुटुंबावर दुखा:चा डोंगर कोसळला असून, त्यांनी सासरच्या मंडळींविरोधात हडपसर पोलिस ठाण्यात पती प्रसाद चंद्रकांत पुजारी, दीर प्रसन्ना चंद्रकांत पुजारी, सासू सुरेखा चंद्रकांत पुजारी आणि सासरे चंद्रकांत पुजारी यांच्यावर गुन्हा दाखल करण्यात आला. सध्या पोलिसांकडून या प्रकरणाचा सखोल तपास सुरू आहे.

हे ही वाचा…