भूतबाधा, जादूटोणा तथा दुर्धर आजार दूर करण्याची ऑनलाईन जाहिरात करून महिलेची फसवणूक केल्याप्रकरणी नाशिकच्या जिल्हा ग्राहक तक्रार निवारण आयोगाने एका भोंदूबाबाला 2 लाखांहून अधिकची मूळ रक्कम परत करण्यासह 50 हजार रुपयांचा भरभक्कम आर्थिक दंड ठोठावला आहे. मह
.
यासंबंधीच्या माहितीनुसार, नाशिक शहरातील उंटवाडी परिसरातील एका महिलेने कौटुंबिक समस्या सोडवण्यासाठी सोशल मीडियाद्वारे उत्तर प्रदेशातील करौली येथील लवकुश आश्रमाचे महाराज संतोषसिंह भदोरिया यांच्याशी संपर्क केला होता. त्यानंतर या भोंदूबाबाने महिलेच्या कुटुंबातील सदस्यांना भूतबाधा झाल्याचा दावा करत एका दिवसाच्या उपचारासाठी 2 लाख 51 हजार रुपयांची मागणी केली होती. महिलेने ही रक्कम बँक ऑफ बडोदामार्फत RTGS ने भोंदूबाबाच्या खात्यावर वर्ग केली होती. तसेच त्याचा पुरावा आपल्याकडे ठेवला होता.
ग्राहक संरक्षण कायदा-2019 अंतर्गत कारवाई
त्यानंतर भोंदूबाबा संतोषसिंह भदोरियाने सदर महिलेला आपण आश्रमात बसून ऑनलाईन विधी केल्याचे सांगितले. पण त्याने महिला व तिच्या कुटुंबीयांना कोणताच फरक पडला नाही. आपली फसवणूक झाल्याचे लक्षात आल्यावर महिलेने भोंदूबाबाकडे रक्कम परत करण्याची मागणी केली. पण बाबाने तसे करण्यास नकार दिला. त्यामुळे महिलेने ग्राहक संरक्षण कायदा -2019 अंतर्गत जिल्हा ग्राहक तक्रार निवारण आयोगाकडे तक्रार दाखल केली. तसेच मानसिक व शारीरीक त्रास झाल्याचा दावा करत 50 कोटी रुपयांच्या नुकसानभरपाईची मागणी केली.
महिलेच्या याचिकेवर सुनावणी करताना ग्राहक तक्रार निवारण आयोगाने भोंदूबाबा संतोषसिंह भदोरिया याला 50 हजार रुपयांचा दंड, शारीरीक व मानसिक त्रासापोटी 15 हजार, तक्रार अर्ज दाखल करण्यासाठी आलेल्या खर्चाचे 7 हजार व महिलेने दिलेले 2 लाख 51 हजार रुपयांची रक्कम व्याजासकट परत करण्याचे आदेश दिले. या प्रकरणी करोली बाबावर जादूटोणा विरोधी कायद्यांतर्गत गुन्हा दाखल करण्याची मागणीही केली जात आहे.
कोण आहे करौली बाबा उर्फ संतोषसिंह भदोरिया?
उत्तर प्रदेशाच्या कानपूरलगत असणाऱ्या करौली गावात संतोषसिंह भदोरिया याचा आश्रम आहे. तब्बल 14 एकरांमध्ये हा आश्रम पसरला आहे. करौली बाबा तथाकित तंत्रमंत्र, जादूटोणा करण्यासाठी कुप्रसिद्ध आहे. कॅन्सरसारख्या दुर्धर आजारावर उपचार करण्याचाही त्याचा दावा आहे. त्याने अनेकांच्या जमिनी हडप केल्याचाही दावा केला जातो. या प्रकरणी त्याच्यावर अनेक गु्न्हे दाखल आहेत. विरोध करणाऱ्यांना हाणामारी करण्यापर्यंत त्याची मजल जाते. यूट्यूबवरही हा बाबा प्रसिद्ध आहे.
पथदर्शक निकाल -अंनिस
महाराष्ट्र अंधश्रद्धा निर्मुलन समितीचे राज्य कार्यवाह कृष्णा चांदगुडे यांनी ग्राहक आयोगाचा निर्णय पथदर्शक असल्याचे मत व्यक्त केले आहे. सामान्य लोकांच्या असहाय्यतेचा फायदा घेऊन अनेक बाबा खोटे आमिष दाखवून फसवणूक करतात. बऱ्याच वेळा भोंदूबाबा परप्रांतीय असल्याने न्याय मिळण्याची अपेक्षा नसते. परंतु, हा निर्णय पथदर्शक असल्याने अशा भोंदूबाबांवर अंकुश बसेल. अशा प्रकारे फसवणूक झालेल्यांनी पुढे येण्याची गरज आहे, असे ते म्हणालेत.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
