पणज येथील व्यापारी रमण सीताराम चांडक यांची दगडावर डोके आदळून हत्या करण्यात आली. घटनेच्या एक दिवस आधीपासून ते बेपत्ता होते. दुसऱ्या दिवशी मंगळवारी पोपटखेड शिवारातील दहिखेड फुटकर शिवारात त्यांचा मृतदेह आढळून आल्याने एकच खळबळ उडाली. अकोट ग्रामीण पोलिसां
.
गजानन साहेबराव रेळे (५५), रा. वडाळी सटवाई, ता. अकोट असे अटक केलेल्या आरोपीचे नाव आहे. पोपटखेड शिवारातील केलपाणी येथील बंद पडलेल्या मे. विदर्भ बोन मिलच्या अर्धवट बांधकाम असलेल्या ठिकाणी एक मृतदेह पडून असल्याची माहिती अकोट ग्रामीण पोलिसांना मंगळवारी सकाळी ७ वाजेच्या पूर्वी मिळाली. माहितीच्या आधारे पोलिसांनी घटनास्थळ गाठले. पोलिसांना मृताची दगडाने मारून हत्या केल्याचे प्रथमदर्शनी दिसून आल्याने, हत्येच्या दिशेने पोलिसांनी तपासाला सुरूवात केली. तसेच मृताकडे असलेल्या ओळखीच्या पुराव्यावरून मृतदेह रमण सीताराम चांडक यांचा असल्याचे समोर आले. रमण चांडक हे ऑटो डिलिंगचा व्यवसाय करायचे. त्यांचे मूळ गाव पणज असले तरी ते अकोल्यातील गीतानगर भागात राहात होते. चांडक हे ऑटो डिलिंग व्यावसायिक असल्याने काहींशी त्यांचा वाद असल्याची माहिती पोलिसांना मिळाल्यानंतर पोलिसांनी त्या क्षेत्रातील अनेकांची चौकशी सुरू केली असता वडाळी सटवाई येथील गजानन साहेबराव रेळे याचेवर पोलिसांना संशय आला. त्यानंतर पोलिसांनी त्याला ताब्यात घेतले. मृत रमण चांडक यांचा पुतण्याच्या तक्रारीवरून अकोट ग्रामीण पोलिस ठाण्यात कलम १०३(१) भारतीय न्याय संहिता प्रमाणे गुन्हा दाखल करण्यात आला असून पुढील तपास पोलिस निरीक्षक किशोर जुनघरे करत आहेत. रमण चांडक सोमवारी दुपारपासून तर उशिरा रात्रीपर्यंत घरी न आल्याने ते बेपत्ता झाल्याची तक्रार त्यांच्या पत्नी ज्योती चांडक यांनी अकोल्यातील जुने शहर पोलिस ठाण्यात मध्यरात्री दिली होती. या तक्रारीवरुन पोलिस त्यांचा शोध सुरू करणार त्याच्या आधीच मंगळवारी रमण चांडक यांचा मृतदेह पोपटखेड शिवारात आढळून आला.
बेपत्ता झाल्याची दिली होती तक्रार
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
