अखिल महाराष्ट्र फेडरेशन ऑफ प्रिन्सिपल्स असोशिएशन ऑफ नॉन गव्हर्नमेंट कॉलेजेसचे ४० वे वार्षिक राज्यस्तरीय अधिवेशन आगामी २५ व २६ जुलै रोजी येथे होत आहे. श्री शिवाजी शिक्षण संस्थेने या अधिवेशनाचे यजमानपद स्वीकारले असून या अधिवेशनात महाराष्ट्रातील सुमारे
.
‘राष्ट्रीय शैक्षणिक धोरण २०२०’ वर विचारमंथन व चर्चा व्हावी, हा या अधिवेशनाचा उद्देश आहे. याशिवाय एनइपीमध्ये समाविष्ट झालेले नवे अभ्यासक्रम, महाविद्यालयाची रचना यावरही सदर अधिवेशनात खल होणार आहे. या अधिवेशनाचे कामकाज डॉ. पंजाबराव देशमुख स्मृती वैद्यकीय महाविद्यालय परिसरातील छत्रपती शिवाजी महाराज सभागृहात सकाळी साडेदहा वाजता सुरु होईल.
श्री शिवाजी शिक्षण संस्थेचे अध्यक्ष हर्षवर्धन देशमुख यांच्या अध्यक्षतेखाली महाराष्ट्राचे उच्च व तंत्रशिक्षण मंत्री चंद्रकांतदादा पाटील हे या अधिवेशनाचे उदघाटन करतील. यावेळी राष्ट्रीय मुल्यांकन आणि मान्यता परिषद तसेच राष्ट्रीय शैक्षणिक तंत्रज्ञान मंचचे अध्यक्ष डॉ. अनिल सहस्रबुद्धे, संत गाडगेबाबा अमरावती विद्यापीठाचे कुलगुरू डॉ. मिलिंद बारहाते, लक्ष्मीनारायण इनोव्हेशन टेक्नॉलॉजी विद्यापीठ, नागपूरचे कुलगुरू डॉ.अतुल वैद्य, महाराष्ट्राचे उच्चशिक्षण संचालक डॉ.शैलेंद्र देवळाणकर, रयत शिक्षण संस्था, साताराचे मुख्य कार्यकारी अधिकारी चंद्रकांत दळवी हे प्रमुख अतिथी म्हणून उपस्थित राहणार आहेत.
अमरावती विभागाचे उच्चशिक्षण सहसंचालक डॉ.केशव तुपे, राष्ट्रीय शैक्षणिक धोरण २०२० सुकाणू समितीचे सदस्य सी.ए.अनिल राव, अखिल महाराष्ट्र फेडरेशन ऑफ प्रिन्सिपल्स असोशिएशनचे अध्यक्ष डॉ.आबासाहेब देशमुख, अखिल महाराष्ट्र फेडरेशन ऑफ प्रिन्सिपल्स असोशिएशनचे उपाध्यक्ष प्राचार्य नंदकुमार निकम आणि सचिव डॉ.सुधाकर जाधवर यांचीही उदघाटन सोहळ्याला विशेष उपस्थिती राहणार आहे.
‘राष्ट्रीय शैक्षणिक धोरण २०२०’ हे शिक्षणक्षेत्रासाठी एक आव्हान असून या आव्हानांना सामोरे जाण्यासाठी सखोल विचारमंथन घडून यावे, हा या अधिवेशनाचा उद्देश असून तो निश्चित सफल होईल, असा विश्वासदेखील हर्षवर्धन देशमुख यांनी व्यक्त केला. श्री शिवाजी शिक्षण संस्थेचे स्वीकृत सदस्य आणि श्री शिवाजी कला व वाणिज्य महाविद्यालय अमरावतीचे प्राचार्य डॉ.अंबादास कुलट हे या अधिवेशनाचे निमंत्रक म्हणून जबाबदारी सांभाळत आहेत तर आयोजन समितीचे सचिव म्हणून श्री शिवाजी कला, वाणिज्य व विज्ञान महाविद्यालय, अकोलाचे प्राचार्य डॉ.रामेश्वर भिसे काम पाहत आहेत. संस्थेचे सचिव प्राचार्य डॉ. वि.गो.ठाकरे यांच्या मार्गदर्शनात अधिवेशनाची संपूर्ण तयारी झाली असून अधिवेशनाच्या निमित्ताने एक स्मरणिका देखील प्रकाशित करण्यात येणार असल्याचे यावेळी सांगण्यात आले. पत्रकार परिषदेला श्री शिवाजी शिक्षण संस्थेचे सर्व पदाधिकारी व आयोजन समितीचे पदाधिकारी उपस्थित होते.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
