सिंगापूरमधील शिक्षण क्षेत्रातील नाविन्यपूर्ण उपक्रम राज्याच्या अभ्यासक्रमात: 48 शिक्षक अन 2 अधिकाऱ्यांचे सिंगापूरात प्रशिक्षण सुरु, शाळांनाही भेटी देऊन साधणार संवाद – Hingoli News

.

राज्यात प्राथमिक शिक्षणामध्ये काही प्रमाणात बदल करून विद्यार्थ्यांना गुणवत्तापूर्ण शिक्षण देण्याचे प्रयत्न शिक्षण खात्याचे आहेत. त्यानुसार अंतरराष्ट्रीयस्तरावर शिक्षण क्षेत्रात राबविण्यात येणाऱ्या वैविध्यपूर्ण तसेच नाविन्यपूर्ण उपक्रमांची माहिती घेऊन राज्यात या उपक्रमांची अंमलबजावणी करण्याच्या हालचाली शिक्षण खात्याकडून सुरु झाल्या आहेत. त्यासाठी राज्यातील उपक्रमशिल शिक्षकांना महाराष्ट्र प्राथमिक शिक्षण परिषदेच्या वतीने शिक्षण पध्दतीमध्ये जगात प्रथम क्रमांकावर असलेल्या सिंगापूर दौऱ्यावर पाठविण्यात आले आहे.

यामध्ये राज्याचे शालेय शिक्षण विभागाचे सचिव रणजितसिंह देओल यांच्या मार्गदर्शनाखाली सहसंचालक सरोज जगताप, उपसंचालक ज्योती शिंदे यांच्यासह ४८ शिक्षकांचा सहभाग आहे. यामध्ये मोठ्या जिल्हयातून दोन तर इतर ठिकाणावरून प्रत्येकी एका शिक्षकाची निवड करण्यात आली आहे. संबंधित अधिकारी व शिक्षक रविवारी ता. २३ सिंगापूर येथे पोहोचले आहेत.

या ठिकाणी आजपासून पुढील दोन दिवस शिक्षकांना प्रशिक्षण दिले जाणार आहे. त्यानंतर प्रत्यक्ष शाळांवर भेटी देऊन शिक्षक, विद्यार्थ्यांशी संवाद साधला जाणार आहे. सिंगापूर येथे प्राथमिक शिक्षण कशा पध्दतीने दिले जाते, शिक्षकांची नियुक्ती कशी केली जाते, शाळा, वर्ग खोल्या कशा पध्दतीच्या आहेत, विद्यार्थ्यांची शिस्त, अभ्यासक्रम यासह इतर उपक्रमांची पाहणी केली जाणार आहे. ता. २७ मार्च पर्यंत हा अभ्यास दौरा असणार आहे. त्यानुसार सोमवारी प्रशिक्षणाला सुरवातही झाली आहे.

दरम्यान, या अभ्यासदौऱ्यानंतर त्या ठिकाणी प्राथमिक शिक्षणामध्ये राबविले जाणारे नाविन्यपूर्ण उपक्रम तसेच तेथील शिक्षण पध्दती याबाबतचा सविस्तर अहवाल महाराष्ट्र राज्य प्राथमिक शिक्षण परिषदेकडे सादर केला जाणार आहे. या अहवालाची तपासणी करून सदर अहवाल शासनाकडे सादर केली जाणार असून त्यातील वैविध्यपूर्ण उपक्रम व नाविन्यपूर्ण बाबींचा राज्यातील प्राथमिक शिक्षणाच्या अभ्यासक्रमात समावेश केला जाणार असल्याचे सुत्रांनी सांगितले.