इतिहास संशोधक इंद्रजीत सावंत यांना धमकी दिल्याप्रकरणी फरार आरोपी प्रशांत कोरटकर याला आज कोल्हापूर पोलिसांनी ताब्यात घेतले आहे. उद्या त्याला कोल्हापूर न्यायालयात हजर करण्यात येणार आहे. प्रशांत कोरटकरच्या अटकेवर इंद्रजीत सावंत यांनी प्रतिक्रिया दिली आह
.
प्रशांत कोरटकरवर इतिहास संशोधक इंद्रजीत सावंत यांना धमकी दिल्याचा व छत्रपती शिवाजी महाराज यांचा अवमान केल्याचा आरोप आहे. याप्रकरणी गुन्हा दाखल झाल्यापासून तो फरार होता. पोलिस गत 25 फेब्रुवारीपासून त्याचा शोध घेत होते. पण तो पोलिसांना गुंगारा देत होता. अखेर पोलिसांनी सोमवारी त्याला तेलंगणातून ताब्यात घेतले. तेलंगणात त्याच्या अटकेची योग्य ते सोपस्कार पार पाडल्यानंतर त्याला कोल्हापुरात आणले जाईल. यावर इंद्रजीत सावंत यांनी समाधान व्यक्त करत सुनावणीपेक्षा एक तास अगोदर अटक झाली, हा योगायोग आहे की ठरवून आहे हे समोर आले पाहिजे, अशी मागणी त्यांनी केली.
काय म्हणाले इंद्रजीत सावंत?
अशा चिल्लर माणसाने पोलिसांना तंगवातंगवी केली ही मोठी गोष्ट आहे. एक महिना सर्व शिवप्रेमी कोरटकरला अटक करण्याची मागणी केली. पाठिंबा दिला त्यांचे आभार मानतो. पोलिसांनी चांगले काम केले. वकिलांनी चांगली बाजू मांडली. विकृत व्यक्तीला अटक केली याचे समाधान आहे, असे इंद्रजीत सावंत म्हणाले.
या कोरटकरला कायदेशीर कारवाई होईपर्यंत लढाई सुरू राहील. उच्च न्यायालयात देखील कोरटकरला जामीन नाकारला असेच चित्र होते. मात्र त्याच्याकडे आता पर्याय नव्हता. तांत्रिक पुरावे जे आहेत ते पोलिसांकडे जमा आहेत. या लोकशाहीत त्यावर कारवाई होईल, यावर माझा विश्वास आहे, असेही सावंत यांनी म्हटले.
कोरटकरची अटक योगायोग आहे की ठरवून?
त्याला कोण मदत करत होते, ते महिनाभर कुठे होता? कोल्हापुरातील कोणत्या अधिकाऱ्यांची मदत घेत होता? ते समोर यायला पाहिजे. त्याला वाचवणारी यंत्रणा कार्यान्वित होती, त्याचा शोध घ्यायला हवा. त्याला वाचवण्याचा प्रयत्न कोण करत होता, त्याचा चेहरा समोर आला पाहिजे. ती प्रवृत्ती कोण हे समोर आले पाहिजे आणि सुनावणीपेक्षा एक तास अगोदर अटक झाली, हा योगायोग आहे की ठरवून आहे हे समोर आले पाहिजे, अशी मागणी इंद्रजीत सावंत यांनी केली आहे.
कागदपत्रे जे बोलतात ते आम्ही सांगतो
जो सत्य इतिहास बाहेर काढला जातो, त्याला विकृत मंडळी कडून त्रास दिला जातो. आम्ही सत्य सांगतो, कागदपत्रे जे बोलतात ते आम्ही सांगतो, स्वतःच सांगत नाही. पण काही विकृत माध्यमातून बोलतात, समोर कधी येत नाहीत. महाराष्ट्र कोणतेही सरकार आले तर ते शिवप्रेमी असतात. पण छत्रपती शिवाजी महाराज यांच्यावर खालच्या थरात जाऊन बोलतात, त्यांच्यावर कडक कारवाई व्हावी, अशीही मागणी इंद्रजीत सावंत यांनी केली आहे.
कोरटकरच्या अटकेवर मुख्यमंत्र्यांची प्रतिक्रिया
दरम्यान कोल्हापूर पोलिसांनी चांगल्या पद्धतीनं टेक्निकल ईव्हीडन्स जमा करत प्रशांत कोरटकरला अटक केली, आता पुढची कायदेशीर कारवाई पोलीस करतील असे फडणवीस यांनी म्हटले. तसेच, कोणत्याही परिस्थितीत महाराष्ट्राचे आराध्य दैवत छत्रपती शिवाजी महाराज यांचा अपमान खपवून घेतला जाणार नाही हेच पोलिसांनी दाखवून दिलेले आहे. बीएनएसअंतर्गत जी कारवाई असेल ती कारवाई आता त्यांच्यावर होईल, अशी प्रतिक्रिया मुख्यमंत्री देवेंद्र फडणवीस यांनी दिली होती.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
