माझ्यावरील टीका योग्यच!: वादग्रस्त कॉमेडियन प्रणीत मोरेचा जाहीर माफीनामा, म्हणाला- ‘एक संधी द्या, स्वतःला बदलून दाखवेन’ – Mumbai News

.

‘मी टीकेला पात्र आहे’

13 जून रोजी इन्स्टाग्रामवर पोस्ट केलेल्या व्हिडिओमध्ये प्रणित मोरे म्हणाला की, त्याच्या ‘क्राउड वर्क’ व्हिडिओमुळे त्याच्यावर मोठ्या प्रमाणात टीका होत आहे आणि त्या टीकेचा तो पात्रही आहे.

‘प्रेक्षकांच्या प्रतिक्रियेत वाहवत गेलो’

प्रणितने कबूल केले की, त्या क्षणी तोही वातावरणात वाहवत गेला आणि निर्णय घेण्यात चूक झाली.

“मीसुद्धा त्या वातावरणात वाहवत गेलो. माझ्याकडून निर्णयक्षमतेत चूक झाली. ही माझी खूप मोठी चूक होती. मला हवे असते तर मी त्याला तिथेच थांबवू शकलो असतो किंवा त्याच्या वक्तव्याचा विरोध करू शकलो असतो. पण मी ते करू शकलो नाही,” असे त्याने सांगितले.

त्याने पुढे म्हटले की, त्या व्यक्तीला मंच मिळाल्यामुळेच हे प्रकरण इतके वाढले.

‘ज्यांच्या भावना दुखावल्या, त्यांची माफी मागतो’

वादामुळे दुखावलेल्या सर्वांची माफी मागताना प्रणित म्हणाला की, या घटनेमुळे ज्यांच्या भावना दुखावल्या गेल्या आहेत, त्या सर्वांची तो मनापासून क्षमा मागतो. तसेच, आपल्या विरोधात सुरू असलेल्या कायदेशीर प्रक्रियेत आपण संबंधित यंत्रणांना पूर्ण सहकार्य करत असल्याचेही त्याने स्पष्ट केले.

‘मला एक संधी द्या’

व्हिडिओच्या शेवटी प्रणित मोरेने भावनिक आवाहन केले. “मला फक्त एक संधी द्या. मी अधिक चांगला माणूस बनून दाखवेन. ही घटना माझ्यासाठीही मोठा धडा ठरली आहे. मी स्वतःवर आणि माझ्या कंटेंटवर अधिक काम करेन. भविष्यात माझ्यात झालेला बदल तुम्हाला नक्की दिसेल.”

यापूर्वीही दिले होते स्पष्टीकरण

वाद वाढल्यानंतर प्रणितने यापूर्वी इन्स्टाग्राम स्टोरीद्वारेही स्पष्टीकरण दिले होते. संबंधित प्रेक्षकाने केलेली वक्तव्ये आपल्या वैयक्तिक विचारांचे प्रतिनिधित्व करत नसल्याचे त्याने स्पष्ट केले होते.

त्यावेळी त्याने मान्य केले होते की, त्या वक्तव्याला आव्हान देण्याऐवजी हसून पुढे जाणे ही त्याची चूक होती. तसेच, भविष्यात अशा परिस्थितीत अधिक जबाबदारीने वागण्याचे आश्वासनही त्याने दिले होते.

वादग्रस्त व्हिडिओ सर्व प्लॅटफॉर्मवरून हटवला

प्रणित मोरेने सांगितले की, वाद निर्माण झालेला व्हिडिओ त्याने सर्व सोशल मीडिया प्लॅटफॉर्मवरून हटवला आहे. मात्र, या प्रकरणावरून सुरू झालेला वाद अद्याप कायम असून महिला आयोगासह विविध यंत्रणांनीही या प्रकरणाची दखल घेतली आहे.

दरम्यान, प्रणितच्या या नव्या माफीनाम्यानंतर वाद शांत होणार की चौकशी आणि कारवाईचा वेग आणखी वाढणार, याकडे आता सर्वांचे लक्ष लागले आहे.

प्रकरण नेमके काय?

प्रणित मोरेच्या एका ‘क्राउडवर्क’ शोमधील व्हिडिओ सोशल मीडियावर व्हायरल झाला होता. त्यात हिमांशू जांगरा नावाच्या प्रेक्षकाने डेटदरम्यान 370 रुपयांची बिर्याणी खरेदी केल्याचा उल्लेख करत महिलांबाबत वादग्रस्त वक्तव्य केले होते. या वक्तव्यावर प्रणितने त्याला रोखले नाही आणि त्यावर हसल्यामुळे त्याच्यावरही जोरदार टीका झाली. या प्रकरणामुळे महिलांच्या संमती, सार्वजनिक व्यासपीठावरील जबाबदारी आणि कॉमेडीच्या मर्यादांवर मोठी चर्चा रंगली.

महिला आयोग आणि सायबर यंत्रणांची दखल

या वादाची गंभीर दखल घेत राष्ट्रीय महिला आयोगाने (NCW) प्रणित मोरे आणि संबंधित व्यक्तीला समन्स बजावले आहे. तसेच महाराष्ट्र सायबर विभागाकडूनही प्रकरणाची चौकशी सुरू असल्याची माहिती समोर आली आहे.

दरम्यान, वाढत्या वादाच्या पार्श्वभूमीवर प्रणित मोरेने काही दिवसांपूर्वी आपले इन्स्टाग्राम खातेही निष्क्रिय केले होते.

वाद संपणार की आणखी वाढणार?

प्रणित मोरेने जाहीर माफी मागितली असली तरी सोशल मीडियावरील संताप अद्याप पूर्णपणे ओसरलेला नाही. काहींनी त्याची माफी स्वीकारण्याची भूमिका घेतली आहे, तर अनेकांनी केवळ माफी पुरेशी नसून सार्वजनिक व्यासपीठावर जबाबदारीचे भान ठेवणे अधिक महत्त्वाचे असल्याचे मत व्यक्त केले आहे.

संबंधित बातमी वाचा…

कॉमेडियन प्रणित मोरेच्या अडचणीत वाढ!:गृह विभागाचा मोठा निर्णय; आता सर्व व्हिडिओंची होणार चौकशी

स्टँड-अप कॉमेडियन प्रणित मोरे याच्या कार्यक्रमांमधील कथित अश्लील आणि वादग्रस्त वक्तव्यांवरून निर्माण झालेला वाद आता अधिकच गंभीर बनला आहे. राज्याच्या गृह विभागाने या प्रकरणाची दखल घेत मोठा निर्णय घेतला असून, केवळ चर्चेत आलेल्या काही क्लिप्सच नव्हे तर प्रणित मोरेच्या आतापर्यंतच्या सर्व अपलोड केलेल्या व्हिडिओ कंटेंटची सखोल चौकशी करण्याचे आदेश दिले आहेत. सविस्तर बातमी येथे वाचा