पुणे शहरातील चंदननगर भागात घरफोडी करणाऱ्या दोन चोरट्यांना पोलिसांनी अटक केली आहे. त्यांच्याकडून सोने-चांदीचे दागिने आणि गुन्ह्यात वापरलेली रिक्षा असा एकूण तीन लाख रुपयांचा मुद्देमाल जप्त करण्यात आला आहे. रोहित नितीन गायकवाड (वय 28, रा. कृष्णानगर, हडपसर) आणि मनीष सुजीत नागपुरे (रा. सर्वोदय कॉलनी, मुंढवा) अशी अटक करण्यात आलेल्या आरोपींची नावे आहेत. चंदननगर येथील एका सोसायटीतील सदनिकेचे कुलूप तोडून चोरट्यांनी ऐवज लांबवला होता. गुन्हा केल्यानंतर चोरटे रिक्षातून पसार झाले होते. या प्रकरणाचा तपास करत असताना पोलिसांनी सीसीटीव्ही फुटेज तपासले. यामध्ये चोरट्यांनी वापरलेल्या रिक्षाचा क्रमांक पोलिसांना दिसून आला, ज्यामुळे तपासाला दिशा मिळाली. तांत्रिक तपासानंतर आरोपी गायकवाड घरफोडी करून सोलापूरला पसार झाल्याचे निष्पन्न झाले. पोलिसांनी त्याला सोलापूरमधून ताब्यात घेतले. चौकशीदरम्यान, त्याने साथीदार नागपुरे याच्या मदतीने हा गुन्हा केल्याची कबुली दिली. चोरलेल्या दागिन्यांची विक्री आरोपींनी हडपसर आणि वानवडी येथील सराफांना केल्याचेही समोर आले. पोलिसांनी त्यांच्याकडून चोरीचे दागिने आणि गुन्ह्यासाठी वापरलेली रिक्षा जप्त केली आहे. आरोपींच्या अन्य कोणी साथीदार आहेत का तसेच आरोपींनी यापूर्वी आरोपींनी कोणकोणते गुन्हे केले आहेत याबाबत देखील पोलिसांकडून सखोल तपास करण्यात येत आहे. परिमंडळ सातचे पोलिस उपायुक्त डॉ. प्रशांत अमृतकर, सहायक आयुक्त नूतन पवार यांच्या मार्गदर्शनाखाली वरिष्ठ पोलिस निरीक्षक नीलेश बडाख, गुन्हे शाखेचे निरीक्षक अमोल धस, उपनिरीक्षक किरण नरवडे, पोलिस कर्मचारी मेमाणे, डांगे, कदम, घावटे, किरण घुटे, लहाने, बेंद्रे, तसेच लष्कर वाहतूक विभागातील सहायक फौजदार गणेश येळे आणि लोकरे यांनी ही कारवाई यशस्वी केली.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
