राम मंदिर देणग्या परत करण्याची तयारी: देणगी चोरीचा आरोप करणाऱ्यांच्या वस्तू चौकशीनंतर परत केल्या जाऊ शकतात

अयोध्या येथील राम मंदिरातील देणगी वादाच्या पार्श्वभूमीवर, श्रीराम जन्मभूमी तीर्थक्षेत्र ट्रस्ट आता दान केलेल्या वस्तूंच्या सुरक्षिततेवर प्रश्नचिन्ह उपस्थित करणाऱ्या भक्तांच्या अर्पण केलेल्या वस्तू परत करण्याची तयारी करत आहे. या दात्यांचा आरोप आहे की, त्यांनी रामलल्लाला सोन्या-चांदीचे दागिने व इतर मौल्यवान वस्तू अर्पण केल्या, परंतु त्यांना पावत्या दिल्या नाहीत. यामुळे त्यांच्या अर्पण केलेल्या वस्तूंच्या सुरक्षिततेबद्दल चिंता वाढली.

सूत्रांनुसार, ट्रस्ट अशा प्रकरणांवर गांभीर्याने विचार करत आहे. जर एखाद्या भक्ताने हे सिद्ध केले की त्यांनीच ती वस्तू दान केली आहे आणि त्यांच्याकडे पुरेसे पुरावे असतील, तर त्यांच्या दाव्याची स्वतंत्रपणे चौकशी केली जाऊ शकते. त्यांची ओळख आणि कागदपत्रांची पडताळणी केल्यानंतर वस्तू परत करण्याबाबतचा निर्णय घेतला जाईल. फसवणुकीचे दावे टाळण्यासाठी पडताळणी प्रक्रिया कठोर असेल. तथापि, ट्रस्टने अद्याप अधिकृत घोषणा केलेली नाही.

वैष्णोदेवी: ५०० कोटींची बनावट चांदी आढळली

वैष्णोदेवी मंदिरात ५०० कोटी रुपयांच्या ‘बनावट चांदी’च्या कथित देणगीप्रकरणी जम्मू कोर्टाने गुन्हे शाखेच्या अधिकाऱ्याला समन्स बजावले. संबंधित अधिकारी २९ जुलै रोजी कागदपत्रांसह हजर राहतील. तक्रारीनुसार, २० टन चांदी तपासणी व वितळवण्यासाठी पाठवली होती, परंतु त्यापैकी ५-६% चांदीच खरी आढळली. उर्वरित चांदीत कॅडमियम, लोह आणि इतर निकृष्ट धातू होते.

धातू-वजनानुसार देणगीची नोंद, यामुळे ओळख कठीण

सूत्रांनुसार, मंदिराला दान केलेल्या धातू व इतर वस्तूंची तपासणी होते व त्यांचे वजन व प्रकार नोंदवले जातात. जर भक्ताला पावती मिळाली नाही, तर अनेक प्रकरणांमध्ये भक्ताच्या नावाऐवजी वस्तूचा धातू व वजन नोंदवले जाते. यामुळे नंतर विशिष्ट दागिनावा वस्तू कुणी दान केली आहे, हे ठरवणे अवघड होऊ शकते. त्यामुळे, वस्तू परत स्वीकारण्यापूर्वी कागदपत्रांची पडताळणी होईल.